sus RÀDIO LENGADÒC. (Picatz sus l'imatge, i tombaretz)
Diga ! Sabe pas se la vegèretz passar aquela mas a ieu, lenga de pelha oficiala de ràdio Platana, en dirècte de Puòg Abon, manquèt pas de me tirar l’uòlh. Vòle parlar d’aqueles camionaires so britiches, que, pecaidonets, se pòdon pas pus emportar l’entrepan cambajon glaçat-formatge-concombre cap a Euròpa. Produches lachièrs e carn made en england son ara enebits, diguèron los tecnocratas de Brussèlas. Lor demòra pas pus, als paures rotièrs simpas dau braç bronzat dau marrit costat, que quatre rodèlas de concombre dins lo pan de mica. Serà longa la setmana !
Aquò te fa rire ? Avisa-te qu’au sanctus t’espèran. Te prenguèsse la panta de t’anar passejar amb la Polida into London, per una dimenjada, poiriás daissar secar un pauc mai la saucissa sus la pèrga de l’ostau e faire la crotz sus fricandèu, tindèla e botifarra… Good morning caulet au mentastre, vas broncar sus lo brunch e t’engargavachar amb las mongetas rojas e docinosas dau dejunar. Auràs lèu fach de davalar !
Vòls que te diga ? Vesètz ben coma son piòts, tant qu’a far, en luòc d’enfectar lo paure monde que se ganhan onèstament son entrepan triangular dau cada jorn, tant qu’a barrar la frontièira, es la varianta anglesa de la covid que caliá empachar de dintrar. Non ?
E nos tracham, un còp de mai, que los que son a la manòbra, parle pas dels camionaires, mas d’aqueles que nos govèrnan, i entendon pas res. Me conòrtan a de bon dins l’idèa de metre dins la remòrca dels camionasses -e, sens solament un crostet- aqueles parlaponchuts e de demandar en son nom lo Franchimandexit, tè, que se’n tornèsson d’ont venguèron !
Mas aumens, aumens ! que God salvèsse the Queen !
Es çò que ne dise ieu…
La guinhada de l'IEO d'Erau. E,.. rau !
Cap comentari:
Publica un comentari a l'entrada