Arribam pas de nos tirar de pel cap totas las constrenchas dels confinhaments repetitius e de las mesuras de prene per que las causas tornen prene un torn normal.
• Salutacion als carnavalièrs : Òc, saludam los 4 carnavalièrs del matin e los 5 del vèspre que faguèron lo torn de la plaça de las Arcadas, lo dimenge 11 de genièr, jorn previst per la dobertura del Carnaval de Limós de l’annada. Bon, al pas aproximatiu e instinctiu de las fecas (que cap de musica los acompanhava), los pauròts foguèron estabosits e macats de se trapar solets e de veire los cafès tancats. Tustèron a las pòrtas, mas cap se dobriguèt. Los proprietaris demorèron recantonats al fons de las resèrvas que demesisson pas !
• Caçaires : D’unes protèstan contra lo manten del dreit dels caçaires d’anar passejar lo fusilh e de córrer darrièr la cacilha. Çaquelà, los caçaires respèctan las règlas sanitàrias : an lo dreit de tirar que sus las bèstias que pòrtan una masqueta !
• Manjar local : L’autre jorn, passèri al restaurant arab del canton de la carrièra. Ara, te cal esperar al freg dins la carrièra. Coma fan pas mai de pizzà, comandèri de tacòs, garantits coma al Mexic, garnits de quebab coma al Liban e acompanhats d’una salsa argeriana. Se vòli aver caçolet, me cal pensar de m’anar aprovisionar a un restaurant chinés, benlèu !? Lo monde es un vilatge…
• Sens dents : Lo president Olanda fasiá prospectiva : sabiá que los sens-dents se multiplicarián. Jos las masquetas, anatz saupre se l’òme o la femna crosats tenon dents, pòrtan dentièr, an la dent de saviesa que buta de guingòi, son desdentats, quant de sòuses i daissèt la mirgueta jol coissin ! Mon paire, pecaire, teniá qu’una dent ; amai trantolava quand fasiá de vent !
• Sens boca : Dins quauquas annadas, imaginatz las vesions d’orror quand nos poirem demasquetar e qu’aurem perdut lo remembre dels morres d’antan : qu’es aquela protuberància amb dos traucs dejós ? E aquela caforna qu’amaga unes rectangles de porcelana (sabi pas mai se serà encara blanca per çò que dentifrici e masqueta s’aparian pas gaire). E, per los que pòrtan lunetas, serà l’esbleugiment que i aurà pas mai la vapor montada de jol masc per rendre fosca la vesion… Quna fòrma prendràn las aurelhas s’an pas mai a resistir o a se plegar al tibar de las elasticas ? Lo primièr o la primièra que farà un poton lo denonciaràn sul pic a la polícia ?
• Jingle bells (1) : L’amiga Josiana Ubaud mandèt una letra al director de Radio-Classique per s’estonar que dins la profusion de cants de Nadal de la planeta que passèron fin de decembre a l’antèna i agèsse pas un sol Nadalet. Los Occitans, sèm d’extra-terrèstres ?
• Jingle bells (2) : A Carcassona, fin de decembre, dins lo centre de la vila, la sonorizacion municipala difusava tanben cants de Nadal amb una profusion d’aires anglo-americans. S’avèm pas ausit un sol Nadalet, benlèu que sèm sords o, alara, nos vòlon muts. Paure monde, i a plan mai que la camba que nos fa mal !
Demascat Roch
Cap comentari:
Publica un comentari a l'entrada