Lo caçolet electronic

 La guinhada de l'IEO 34 ! 

sus RÀDIO LENGADÒC, d'escotar sens cap de moderacion. (Picatz sus l'imatge, i tombaretz)

Diga ! E çai venguèt la virussada, e pas luònh de la Passejada se barrèron las terrassas dels cafès rambalhaires de las lampesas treslusentas… Dau còp an desaparegut dau païsatge tubaires cortalens e sos dòna-d’èr vapotejaires, e amb eles, las fumairòlas perfumadas d’èrbas de Provença que s’enlairaravan dins lo matin clar nos donant pròva que valiá lo còp que se descarcassèsse lo Daucròs …

E òc, son plegats darrièr las masquetas,  los entubats de l’e-canelon e las flairas nolentas que carrejavan dins son èisserva : flor de cogolerta, miugrana entredobèrta, aureta de pineda… quand l’aire de nòstras ciutats sentissiá a la bombineta desodorisanta dels comuns e que ton vesin, aquel que cargava un alen de cagadors, degalhava una fortuna per passar a la pompa faire lo plen. « L’abséncia de tabat rend con, ges de fum sens fuòc, ges de fum sens taxas ! »

Mas, lo passat es fumat. Lo darrièr condemnat a mòrt demandèt una darrièira e-cigareta e faguèt faire d’emperaus au borrèu de servici abans que de s’escantir sus la cadièira electrica dins una belugassa…

Vòls que te diga ?  Vos vòle rassegurar. Coma lo mond dels mercands ne fa totjorn quauqu’unas que crèman au lum e qu’an a sa disposicion un fum de cercaires que cèrcan e que n’an dins lo cigarron, nos van lèu engimbrar lo caçolet electronic. Que vapotejas que vapotejaràs, se i a ben quicòm dins la vida que se vapoteja es plan lo caçolet. Non ?

Enfin, es çò que ne dise…

 

Pòst-escriptum : Levat per los Occitans de la bona saca que sèm que sabèm plan qu’un pauc de pèbre d’ase dins lo caçolet apasima preventivament lo fuòc a la tripalha. Mas, me diretz, e auretz plan rason : Lo Caçolet aquò es una Civilizacion…

…çò que ne dise ieu !

 

La guinhada de l’IEO34. E, rau !