AQUÒ CAUFA !

  La cronica Midi Libre dau Joan Loís Blenet

La Lei Molac ne finís pas de faire actualitat. L’avèm analisada aicí aprèp lo vòte istoric dau 8 d’abriu. Caliá esperar la proclamacion de la Lei. Aquò’s dau President qu’a 15 jorns per ba faire. Es tanben lo delai per la portar au Conselh Constitucionau qu’es lo Cerberus Maximus de la Republica Gauliana. Vaquí que lo darnièr jorn, alentorn de vint oras, tomba un recors, aprestat a la chut-chut, signat de deputats de la macronia. Ne caliá seissanta, n’an trapat un de mai, pròva que lor calguèt rasclar fèrme. Enquèsta facha es plan lo clan Blanquer que menèt lo còp, lo recors foguèt aprestat per son gabinet. Es un afar formidable que lo govèrn pèrd a tot còp. Primièr : una ataca en règla contra las lengas regionalas en plenas eleccions regionalas e departamentalas. Granda emocion, se comptan pas pus las reaccions enferonidas, cal saludar la performança. Puèi aquò tiba bravament las garolhas entre los deputats macronistas. Enluòc de passar lis e d’apasimar, nani, aquí d’essença sul fuòc. A mai de deputats contèstan d’aver signat lo recors, lo melhor es a venir ! Enfin vendrà l’avís dau CC gaire abans las eleccions. S’es marrit, ràbia e detestacion garentidas per la macronia. Se per astre la resulta es bona per la Lei, la desconfida pel govèrn serà dau domeni de l’art, un cap d’òbra !

Traduction à retrouver sur Midilibre.fr