Segonda estapa : Capestanh-Marselheta- dimars 2 d'octobre. (2/4)
Quin dejunar ! Mercé plan Patrícia, Enric, a leù ! Son 8 oras. Lo canal serpenteja. Polit ! Encara de vent ! Fasèm una quinzena de km, sèm arrestats : abatatge de las platanas malautas. Podèm tornar pedalar mas cal daissar lo canal pendent 6 km (rota departamentala).
Aquí lo canal ! mas es lo canal de « La Robina » (de Narbona fins Pòrt-la-Nòva), viram a drecha, lo canal de Riquet es a 500 m.
Lèu, lo polit vilatge de « Somalh ». 12 oras e mièja. Peire a crebat, ròda de davant; a lèu reparat . Trapam un pichòt restaurant plan agradiu. Menut: merluça fresca amb ris, cervesa de barril, cafè. Va plan, podèm tornar sul la bica de montanha !
Cap a Marselheta e totjorn lo vent dins lo nas ! Un fum d'òbras d'engenhariá: pòrtaigas, pont-canal de Paraza, esclusas...
De barcassas passan : « Bonjorn ! » mai d'un còp amb la man que la votz s'entend gaire amb aquel vent !
Fasèm de fòtos de placas que marcan la distància d'una esclusa a la seguenta.
Gaire de ciclistas, sèm solets, mas fa pas res, sèm plan aüroses sus la bica de montanha !
De Puècheric fins Marselheta, longas linhas dreitas .
Esclusa de Marselheta, cal quitar lo canal per anar fins la cambra d'òstes. Cercam un briconèl sus de pichòtas rotas puèi demandam lo camin a una dòna e seguissèm darrièr sa veitura! Mercé plan !
Per manjar, avèm pas tot çò que cal. Lo vilatge de Marselheta es a 3 km, disi a Peire que vau anar a las crompas mentre que se docharà.
La fornariá fa tanben especiariá ; crompi de cambajon, de chocolat, bescuèches, formatge, pomas.
Torni, lo vent me buta!! Aquò's un regal !
Me dochi. Va plan !
Pèire aviá preparat una ensalada de pomas d'amor (del sieu òrt) amb d'uòus durs (de sas galinas).
Manjam coma cal, puèi estudiam lo camin per l'endeman, lo mai long, 85 km, e al lèit !
Uèi avèm fach 78 km.
De seguir.
Cap comentari:
Publica un comentari a l'entrada