Majoritat repòrt

 La guinhada de l'IEO 34 ! d'escotar sus RÀDIO LENGADÒC. (Picatz sus l'imatge, i tombaretz)

Diga ! Per un paure ase de remonta coma ieu, las causas venon de mai en mai malaisidas. Volguèssetz, anam ensajar d’i veire un pauc mai clar amassa.

Lei Mollac : per çò de las lengas minorizadas, la majoritat de la majoritat amb lo sosten de la majoritat de las minoritats metèt -a una granda majoritat- en minoritat aquela majoritat e son govèrn. I sètz ?

Mas una minoritat malonèsta de la majoritat malmenèt maliciosament la majoritat çò que mòstra l’amoralitat d’aquela minoritat que respècta pas lo vòte de la majoritat en volguent minorizar d’unes articles de la lei. I sètz totjorn ? Constatam tanben un disfonccionament màger -una anomalia – dins aquela republica d’enarcas e d’anormalians e los  manipòlis miserables e mesquins d’un ministre malfachós a la manòbra fan pas qu’amolir nòstra paura democracia.

Vòls que te diga ? E ara, aquela minoritat a minimà de la majoritat -mercé sos amics mai que madurs de l’Epad dau Conselh Constitucionau- mermèt la lei que passèt pas la malha de son article 2. Antau metèt en minoritat la majoritat malastruga. Me demande ieu çò que poiriá dire la majoritat silenciosa se parlava, mas per definicion, se cala davant la minoritat mascanhaira d’una republica malautejanta que ven de mai en mai una monocracia. Me pense pasmens que dins sa màger part - per pas dire dins sa majoritat- maissariá maissant la majoritat silenciosa. A nautres de la tornar emparaular.

Dins las vilas los cinèmas son a tornar dubrir amb a l’aficha : Article II, l’arma fatala ! o Majoritat repòrt. Auretz que de causir. M’anirai ieu per las garrigas nautas ausir cantar lo cocut…

 

Enfin es çò que ne dise, uòi…

 

La guinhada de l’IEO34. E, rau !