Lo Canal de Riquet (4)

Mescladís, de Bobí lo Contejaire. (Robèrt Pastor) Cada dijòus dins Midi Libre, Pays coeur d'Hérault, edicion de Lodèva.

e ara, pas que per vautres sus lo blòg de l'IEO34.

Dejunam coma cal e a 9 oras sèm sus la « bica » !

500 m de còsta e cap a l'enclusa. Lo camin, enquitranat, de bon rotlar ! De ponts de brica ròsa de Tolosa encamban lo canal. Aquò nos agrada fòrça ! I a de mond : caminaires, ciclistas, correires ! Lo paisatge es mai que polit, caminam doçamanet, que l'estapa es pas tròp longa. Podèm remirar lo paisatge,lo canal...

A miègjorn, sèm a un quinzenat de km de Tolosa.

Arrivbam a l'enclusa e trapam un restaurant.

Manjarem aquí. Ensalada amb cambajon, peis e pastas, pastisson, cafè. Plan bon !

Avèm de temps alavetz, gaitam un pauc lo paisatge, los batèus, lo mond...

 Los darrièrs km  e puèi  Tolosa! La ciutat ròsa! Sèm plan arribats. Uèi avèm fach 55 km,  sèm aüroses coma nenets ! Demandam a una dòna de faire de fotòs  ! Cal marcar lo còp, immortalizar aquel moment !

Mercejam ! E ara cap a la gara Matabiau. Una passejada un pauc  dins la vila, puèi la gara. Aviam reservat lo trin de 19 oras. Pèire s'entresenha, i aurà un trin a 17 oras. Va plan !

 Son 14 oras e mièja, avèm encara lo temps. Caminam amb la bica sus l'avenguda fàcia a la gara, nos assetam a un cafè e fasèm un bilanç de la nòstra passejada : lo vent a la debuta, los abatatges e los cambiaments de camin, mas tanben d'images inoblidables, de rencontres amb de mond (enclusas,vilatges...).

Finalament avèm fach mai de 300 km !

Tornam a la gara. 17 oras, lo trin arriba.

Lo viatge se passa plan e arribam a Seta, son 19 oras un quart. Miquèla es aquí plan contenta de nos veire gaujoses e prèstes per una autra virada ! Pas deman, cal pas quichar !

Dintram a Sant Esteve, lo nòstre vilatge.

 

Epilògue : Doas setmanas passèron. D'aigats mortals dins Aude : a Trèbes, e d'autres endreches desconeissables ! Paure mond, pauras familhas en dòl ! Cal ajudar lo mai possible, de segur ! Coratge a totes !

Fach a Sant Esteve de Gorgàs, lo 29 d'octobre de 2018 - Robèrt PASTOR.