• Manu es de retorn : Quand la Matilda tornèt, foguèt l’escasença de faire una granda fèsta. Mas, aquí, pel Manu, sabi pas qual lo va convidar per un aperitiu. La consòla de Barcelona benlèu que son grop centrista e espanholista se petacèt per li balhar un avantatge numeric sul front independentista, mas daissa Catalonha tot content de sos chapòts, de sas messorgas e de sos cambiaments de pè. Serà pas tanpauc convidat a beure un pastagàs en Provença amb sa proposicion d’arrasar unes barris de Marselha e de cambiar la populacion. E, aprèp èsser anat plorar cò del President per tornar ministre, lo vaquí comentator a la ràdio e a la television. De segur que sos comentaris avisats van esclairar nòstra paura e deficienta comprenèla !
• Per la remontada : Farem coma se la causida de l’eslogan de Montebourg per sa candidatura a la presidéncia de la Republica èra la marca d’un occitanisme afirmat amb la mesa en abans d’aquel mot : REMONTADA. (Bon, es lo Maloney que passèt lo tombat de la victòria dels Dracs sus Sant-Helens, pas l’Arnaud). Ja, son nom Montebourg mòstra una volontat de pujar cap a las mai nautas foncions, de daissar la ruralitat per s’urbanizar, de quitar las classas popularas per s’emborgesir. Per l’ora, se mòstra remontat coma una pendula sus las politicas en plaça. Òme de paraula, sostenguèt lo paure Hamon lo còp passat, mas avodèt que votèt Mélenchon (quicòm li èra montat al cap ?) ! Mas, i podèm véser tanben, una idèia pels Occitans de montar cap a la capitala per i prene lo poder, d’una volontat que sauprà tustar del punh sus la taula coma se balha quauques cofals e carpans dins la mesclanha remontada d’una partida de rugbí, la volontat de contunhar de montar amb los tropèls a l’estiva, una volontat de montar en cima de l’aficha. Çaquelà, vesi ja un problèma bèl per el : la causida d’un mot dins una lenga autra que lo francés coma eslogan, amai comportèsse pas de signes diacritics, serà una probabla rason de declarar anticonstitucionala sa candidatura ! Meteis problèma pel Partit Socialista que vòl presentar una candidata amb un nom castelhan (o pel RN amb un nom breton) !
• Defensa del francés : Al grand rescontre mondial ecologic de Marselha, lo President anoncièt que França organizariá un One Ocean Summit.
• Manca d’èime : I a quicòm que vira pas redond al reialme del fòbal ! L’equipa mandada als Jòcs Olimpics èra mai que pietadosa : los clubs refusant de mandar los jogaires convidats. Quand se vei l’èime de las equipas d’and, volèi e desquet !! Faràn la meteissa causa pels Jòcs de 2024 ? E l’equipa bèla dels Blaus que sembla d’aver perdut lo biais de tustar dins una pauma e de jogar collectivament ! La difusion dels rescontres del campionat es pas fisada a las cadenas costumièras : an tirat las leiçons de l’episòdi Mediaprò ? E vaquí que s’i ajusta la partida non-acabada entre Niça e Marselha, sens parlar del poiridum dels crits, bandeiròlas e messatges suls rasals a-socials… Anatz véser de rugbí : totes darrèr los Dracs en Super-Liga !
Desmontat Roch
Cap comentari:
Publica un comentari a l'entrada