Mescladís, de Bobí lo Contejaire. (Robèrt Pastor) Cada dijòus dins Midi Libre, Pays coeur d'Hérault, edicion de Lodèva.
Aquel extrach es a la debuta de l'Autbòi de Nèu de Max Roqueta (Verd Paradís I), mas a l'ora d'ara los boisses del Larzac son mai que mai « malauts » !
Del costat de La Vacariá es un espectacle de finimond, de cachavièlha coma se las bruèissas avián emmascat tot lo país !
Mas, son pas las bruèissas, es la « pirala del bois » !
Qu'es aquò ?
« La pirala del bois » (Cydalima perspectalis) es un lepidoptèr vengut d'Asia en França, en 2008.
Es la canilha que manja força fuèlhas de bois !
Cicle de vida de la « pirala del bois »
1/ En febrièr-març las canilhas manjan las fuèlhas fins a l'estadi de ninfòsi (transformacion en ninfa).
2/ Quand l'imagò (insècte adult) es « nascut », s'envòla per se reproduire. ( debuta de junh).
3/Las femes daissan los uòus sus l'envèrs de las fuèlhas. Al cap de sèt jorns las canilhas manjan las fuèlhas pendent un mès puèi dintran en nimfòsi al mès de julh e aquò per tres setmanas ; l'adult sortís per se reproduire. Aquò's la segonda generacion entre mièg julh e agost.
4/ La darrièra generacion (3 o 4 segon la data d'arribada del freg) nais abans l'ivèrn. Las larvas s'embarran dins un cocon fins a la prima...
Alavetz, consí faire per luchar ?
En primièr trapar d'autras entresenhas amb los « professionals » de la natura, cercaires, scientifics.... (ONF, CNRS...).
Cal pas tractar amb de produches nocius per las plantas e las bèstias !
Qualques idèas : Netejar los dejos de las fuèlhas, metre de fialats suls boisses, mas dins la natura sembla plan complicat ! Ensajar de favorizar la venguda d'aucèls predadors : blaveta, passerat, e ratapenada (mamifèr !)...
Cal esperar de trapar lèu-lèu una solucion, mas aquò's pas aisit e plan tristonet !
Alavetz bona setmana e tenetz vos fièrs !
Cap comentari:
Publica un comentari a l'entrada