« A vos o saupre » disiá l’encantaire o lo garda d’una votz fòrta per faire conéisser un anonci de la comuna. Atau saupretz que dempuèi la lei NOTRe en 2015 las lengas regionalas son identificadas dins las competéncias das collectivitats. En mai de la dau torisme, de la cultura, de l’espòrt, comunas, departaments e regions an la competéncia partejada de « la promocion das lengas regionalas ». Emai es marcat dins un sens positiu. Fins ara, coma èra pas explicitada, elegits e administratius se’n servissián per se justificar de pas res faire. Quora un militant rebecava, qu’en bona logica (grand meriti proclamat de França) la cultura occitana èra part de la competéncia cultura, respondián DRAC, e la concepcion supremacista de la cultura que n’avèm ja parlat. Aquò per la majoritat que fasián pas res. Los que fasián un quicomet eles se lausenjavián de lor audàcia « O fasèm maugrat que siá pas dins las nòstras competéncias, mesuratz nòstre coratge e que podèm pas faire mai ». Atau se compren la butada capuda per ganhar la pichòta notacion de l’article L 1111-4 qu’es una avançada dobla : d’una nomenar clarament lo domeni das lengas istoricas dau país. Pareis qu’es un francés que diguèt « Çò qu’es plan pensat es dich clarament ». Nomenar, prealable a l’accion. De dos es un escapatòri de mens.
Traduction à retrouver sur Midilibre.fr
Cap comentari:
Publica un comentari a l'entrada