Lo radassièr Dequéia

La guinhada de l'IEO34 sus ràdio Lengadòc 

(en picant sus l'image)

 

Diga !  I a lo Macron que se’n tòrna de vendre a de terroristas 80 avions de combats, un planponh d’elicoptèrs, los supositòris que lor cau per faire frapas cirurgicalas e lo gal de França que cacaraqueja sus son femorièr dins lo temps que la familha Dassault ensaca ; i a Fukushima e Tchernobil que son coma d’olas pressions e que se van lèu lèu faire petar lo cabucèl que lo fuòc nuclear las rosiga dau dedins ; i a los glacièrs que fondan tant talament que dins pas gaire aurem pas pus de glaçons per metre dins lo pastís ; un parelh de palhassas mediatics de mai que montan, que montan a l’ultradrecha … ; dins lo temps que las ersas de la covid se seguisson a de reng coma una mar nòstra que nèga despietadosament lo paure monde que fugisson guèrra e misèria.

Vòls que te diga ? Mas la sansonha que se’n tòrna uòi sus los malhums socials es la question fondamentala de subrevida : « Coma dètz dau cent dels europeencs, sètz estats concebuts, de òc o de non, dins un lièch Ikea ? Ai un bon amic que dintrèt un jorn dins un d’aqueles magazins, èra lo darrièr còp que lo vegère. Me pensère primièr que s’èra perdut mas benlèu que passa son temps d’un biais mai agradiu a ensajar los lièches. E los Occitans dins aquel afar ? D’onte venètz ? Onte sètz estats concebuts ? Vòstres parents s’embauquèron dins una garrigassa o montèron a la fenial a dos per ne davalar a tres ? Saique faguèron pas aquò en bona cooperacion dins la cava viticòla dau vilatge ? Mas, o deve dire de racacòr, la tèsi Ikea se ten e se defend. Quand ensajatz de montar un de sos mòbles, vos sòbran totjorn dos o tres vises que sabètz pas onte van. E quand uòi vese totes aqueles que lor mancan un bolon me dise que i a un molon de futurs parents qu’encapèron pas condrechament la notícia d’emplèc…

Enfin es çò que ne dise, ieu...

 

 

La guinhada de l’IEO34. E, rau !