PAPIERÒT MENERBÉS (In La Semaine du Minervois, 16/12/21)

 De negre e de blanc

• All Blacks : Se fan una glòria, los quinzistas, d’aver batut los All Blacks. Mas tot èra jogat abans de començar : los All Blacks cridant lo haka vestits de blanc, es un imatge subrerealista e en pèrda de fòrça e de vam !! Los Dieusses del país i an pas res comprés e son demorats a faire lo sieston del temps qu’N’Tamack e Jaminet marcavan punts !

• Contradiccion : Lo Zemor qu’anóncia sa candidatura per la presidéncia de l’Estat francés lo jorn ont la Josefina Baker dintra al Panteon. Lo truc dels imatges…

• Z : Çaquelà, soi plan (des-)onorat d’aprene que lo Zemor legís aqueste Papieròt menerbés e que pren en compte la comparason que faguèri un còp passat entre el e Zorrò. De segur, i comprenguèt pas res, vist que pensam lo contrari. Mas, l’endeman de son anóncia de candidatura, las parets se cobrissián d’una aficha simplassa : Z 2022 !

• Divendres negre : Abans, s’esperava la setmana dels quatre dijòus, ara d’unes te fan la setmana dels sèt divendres negres. A faire remesas de la mitat o dels tres-quarts, arribas pas mai de saupre qual es lo prètz de las causas que seriá, coma dins lo conte, « lo just e la rason ». 

• Defensa de l’occitan : La Region Occitania defend nòstra lenga d’Òc. Atal, la mòstra presentada a l’Ostal de la Region de Carcassona se titola  "Live, Love, Refugee". Imatges de Liban qu’es pas, que sapie, un país anglofòne, que d’unes classan dins la francofonia e ont se parla l’arab. E lo trobador Jaufre Rudèl anèt morir a las pòrtas de Tripòli (lo de Liban, justament…!)

• Lo retorn de la negra : Los mercats audencs de la trufa negra an représ dissabte passat del costat de Mossolens. Ongan, cal aprene a solfinar lo campairòl magic a travèrs de las masquetas del protocòl sanitari de seguir al pè de la letra (de quna letra, vai-te’n saupre : degun me poguèt balhar l’informacion).

• Blanca nèu : Las estacions ivernencas tornan dobrir. Ara, que tombèsse de nèu, aquò’s una autra question que borrilhs e rescalfament climatic s’aparian pas plan.

• Al regime : Abans los ressopets de Cap d’An, ai entamenat un regime draconian : bòlas de picolat e favòls lo dimenge 5 amb Limós-13, sopar-trufada lo divendres 10 per se sovenir de Joan Bodon, caçolet abans Carcassona-Dragonets aqueste dimenge 12, 13 dessèrts per la serada nadalenca a la Tuta d’Òc (librària occitana de Tolosa) aqueste dimars 14,… Lo tot es de trapar lo bon ritme per pas agantar un mal de coide o de punhet a levar las forquetas e los veires !

• La guitarra de Cabrèl : Per sa tombolà, la Calandreta La Dauna de Peçac (Gironda) propòsa un lòt original. Per 5 èuros, podètz ganhar una guitarra ofèrta e dedicada pel Francís Cabrèl ! Avètz duscas al 9 de genièr per crompar una bilheta (www.calandreta.dauna.fr) e prene unes corses de guitarra en prevesion. Aprèp, vos poiretz totjorn contentar de musiquejar de la guitarra somària coma lo Robèrt de la Punta de Pesenàs : tres linhas de bling, tres linhas de blong… e fai tirar !

• Corrièr : Vos daissi, que soi en retard per mandar ma letra a l’Òme-Nadal !

Grisonet Roch