Lo Mescladís, de Bobí lo Contejaire. (Robèrt Pastor) Cada dijòus dins Midi Libre, Pays coeur d'Hérault, edicion de Lodèva.
Aital cantava Guilhem dins una carrièra de Montpelhièr aquel jorn de genièr de 2022. Èra estudiant, dempuèi un an en Istòria e tanben en Occitan. L'Occitan i agradava, l'aviá ausit quand èra pichonet amb son grand e estudiat (remembre « Guilhem e lo Drac del Larzac » Midi Libre decembre de 2020).
Cantava per preparar lo Carnaval 2022 dins lo sieu vilatge de Montadavala . Amb la COVID pas de Carnaval en 2020 e 2021 ! Mas aqueste annada, Carnaval es lo disabte 19 de març, un jorn abans la Prima.
Lo dimarç gras serà passat (aquesta annada es lo 1 de març), mas a Montadavala, Carnaval se fasiá a l'entorn de la Prima per festejar la fin de l'ivèrn !
Guilhem aviá prepausat a la còla del vilatge de faire de recèrcas sus Carnaval dempuèi los Romans e las fèstas « Saturnalas », l'Edat Mejana, Carnaval dins lo mond e en Occitania...
Fariá, textes, fòtos per una exposicion dins la sala de las fèstas del vilatge.
Per Carnaval cadun se desguisava coma voliá e coma de costuma lo « Caramentrant » (autre nom de Carnaval) seriá jutjat e brutlat sus la plaça del vilatge en cantant :
« Adieu paure, adieu paure, adieu paure Carnaval ! Tu te'n vas e ieu demòri, per manjar la sopa a l'alh,tu te'n vas e ieu demòri per manjar la sopa a l'òli ».
Mas se traparà tanben de cançons novèlas amb de paraulas adaptadas a la vida vidanta, la vida de l'annada acabada.
Guilhèm era plan gaujós, dins la carrièra de Montpelhièr aquèl jorn de genièr de 2022 !
Sabiá pas encara que lo 24 de febrièr, una catastròfa arribariá : la guèrra en Ucraïna !
Lo Carnaval se fariá a Montadavala ? E cossí ? (de seguir)
Adieu brave mond, e pensatz fòrt : Ucraïna !
Cap comentari:
Publica un comentari a l'entrada