Lo Mescladís, de Bobí lo Contejaire. (Robèrt Pastor) Cada dijòus dins Midi Libre, Pays coeur d'Hérault, edicion de Lodèva.
Benlèu avètz vist sus de placas d'intradas de vilatges, de noms en Occitan, dins Còr d'Erau.
Anam veire coma s'escrivon qualques vilas, païses, continents, flumes e montanhas en Occitan.
Vilas d'Erau e d' Occitania : Agde, Besièrs, Seta, Montpelhièr, Carcassona, Ais de Provença, Avinhon, Orlhac, Massilhan, Montalban, Bordèu, Nimes, Niça, Lo Puèi, Rodés, Tolosa, La Sala, Valença...
En Occitan jamai d'article davant los noms de païses, de continents, de mars, de flumes...levat se lo nom es precisat per una qualificacion (Lo Lengadòc d'ara)
Païses : Austria, Belgica, Danemarc, Espanha, Irlanda, Itàlia, França, Grècia, Suècia, Soïssa, mas se ditz Los Païses-Basses e Lo Reialme Unit.
Continents : Euròpa, Africa, America, Asia, Oceania, Antartica.
Mars, oceans, flumes : Mar Mediterranèa, Ocean Atlantic (se ditz lo mai sovent : Mar Granda), Ocean Pacific, Ocean Indian, Ocean Artic.
Flumes, ribièras : Erau, Òrb, Aude, Gard, Avairon, Lerga, Ròse, Tarn, Dordonha, Cruesa, Viena, Alièr, Ador, Garona, Durença.
Montanhas : Lo Massís Central, (los) Pirenèus, los Alps, (Las) Cevenas.
Alavetz podètz ensajar de far de frasas amb aqueles mòts . Per exemple : « Lo flume de Besièrs se sona Òrb, es per aquò que lo mond de Besièrs es plan ric !!! », « Lo canal de Riquet va de Seta fins Tolosa , es de bon far a bicicleta ».
Podètz aprene cançons : « Per passar lo Ròse, nos cal èstre dos, per lo ben passar, nos cal saber dançar ! Anem passa, passa, passa, anem passa lo ! »
«Lo cocut es mòrt es mòrt en Espanha, i an tapat lo cuòl amb una castanha ! E òp, as pas entendut cantar la cigala, E òp, as pas entendut cantar lo cocut ! »
« Los carbonièrs de La Sala, Occitans sens o saber, cantan l'Internacionala, la cançon del desespèr, cantan l'Internacionala, la cançon del desespèr ! » Tèxt de Bodon cantat per Mans de Breish.
Al còp que ven, e portatz vos plan !
Cap comentari:
Publica un comentari a l'entrada