Diga ! Èrem de maridatge dissabte passat e ploviá a ferratasses. A la sortida de la glèisa, la nòvia plorava a bolhon totas las lagremas de son còs tant talament tombavan de rabanèlas e sa ploradissa, pecairòta, se veniá apondre a l’aigatge, dins una gandòla qu’aviá pas besonh d’aquò per desbordar… Plan aürosament, lo nòvi, mercé son telefonet darrièr crit de la poma a mitat manjada, capitèt de tocar la wedding planner que faguèt sulpic un briefing amb son staff dins l’open space, còsta lo showroom, e que diguèt que caliá daissar plòure…
Vòls que te diga ? Degun lor aviá pas res demandat, a eles, los senators de ràdio platana que s’escacalassavan amistosament dins sas bòtas de cauchó caqui, la cara amagada per sos parapluòjas negres a agachar la desbaruta de la nòça e pasmens, pasmens… T’aurián dich, los senators, t’aurián dich que « Jorget, Marquet, Tropet, Croset son los cavalièrs de la freg, amai quauques còps Joanet » e qu’en mai la freg sovent per sanflorada t’ofrisson la ramada.
Aicí sèm, veja-aquí çò que t’arriba quand te copas de tròp de tas rasigas, e sens rasigas, banhadas son las flors polidas …
Rai, diguèt la wedding planer servirem lo coctèl dejunatòri jos lo cobèrt au fons dau pargue dau castèl. Que s’anatz dins un maridatge uòi, i a pas pus d’aperitiu : tròp vulgar, tanpauc de vin d’onor que tròp comun, te convidan au coctèl per te pagar lo Champanhe. M’auriá agradat de beure un pastís, mas n’i aviá pas. Pasmens es pas l’aiga que mancava per i metre dedins !
Enfin es çò que ne dise, ieu...
La guinhada de l'IEO d'Erau, sus ràdio Lengadòc
Cap comentari:
Publica un comentari a l'entrada