Lo Mescladís, de Bocbí lo Contejaire. (Robèrt Pastor) Cada dijòus dins Midi Libre, Pays coeur d'Hérault, edicion de Lodèva.
Vaquí un conte tirat del libre « Lodeva, ciutat occitana » (edicion « presses universitaires du Midi »). Ai fach una adaptacion que jògui dins l'espectacle « COVID, non ÒC VID ! ».
A Colhonàs l'an passat, conneissètz Colhonàs ? Es lo vilatge a costat de Montadavala, mon vilatge. . Batiston aviá un tropelon de cabras plan polidas. Mas, sustot aviá lo boc que li assegurava d'argent quand lo monde li menava las cabras.
E Batiston lo sonhava, lo sonhava aquel boc! L'apaturava plan coma cal e, per que prenguèsse pas mal, lo metiá a se cochar dins un canton de sa cambra. Lo monde li disián :
-Mas Batiston ...e l'odor ?
-O, saique se i acostumarà ben lo boc a l'odor !
E Òc, es Batiston, Batiston de Colhonàs, plan brave, un bravàs de primièra !
Malurosament, coma un fum de monde,Batiston agantèt aquela P... de Covid, èra plan crebat e decidiguèt de plegar lo tropèl, de lo vendre. A Colhonàs, los qu'avián de cabras èran pas contents !
« E ara ? Onte nos las caldrà menar ? A Montadavala, sul Larzac ? Non , aquò's pas possible ! »
Alavetz al conselh de la comuna decidiguèron de crompar lo boc e de lo plan sonhar coma fasiá Batiston.
E lo garda de la comuna lo teniá dins un membre de la comuna, e tanben l'apasturava coma cal.
Los primièrs meses aquò se debanèt coma de costuma, lo boc fasiá lo trabalh amb las cabras !
Mas dempuèi un brieu,s'anava jaire dins un canton. Èra malaut ? Non, que manjava coma cal !
Alavetz , lo monde anèron veire Batiston, en repoteguant :
« Nos as vendut un boc que val pas res, nos as engarçat, i a quicòm que truca!
-Non, non es normal.
-Normal ?
-E ben, que volètz ? respondèt Batiston, ara qu'es vengut fonccionari, per anar amb las cabras, aquò pòt esperar ! »
E ara per trapar de formatges, cal anar a Montadavala !
Adieu e portatz vos plan !
Se pòt escotar « Lo Mescladis » de Bobí sus lo siti de Radio Lenga d'Òc o de Radio Lodève.
Cap comentari:
Publica un comentari a l'entrada