Diga ! Avèm sus lo site dau Congrès, « Votz », una aisina de sintèsi vocala qu’es terribla e que francament vos recomande. Basta de picar un tèxte e lo podètz ausir en lenga nòstra, en gascon o lengadocian. Tè, uòi, avètz remarcat? li daissère un pauqueton la paraula, per vos aprestar a la ràdio de deman quand lo Melenchon m’aurà donada la retirada e que serai desmaterializat !
Bon. Ie tòrne en viu que se cau quand mèmes ganhar las trempas ! Plan polit tot aquò mas per lo GPS en occitan cau esperar un pauc, avètz pas finit de vos pèrdre per rotas e ciutats ! Per benastre, conoisse ieu totes los camins de mon país ! E per benastre tanben, per aqueles que pòdon pas sofrir las voses aparisenquidas costumièiras qu’an aquelas mecanicas modèrnas, i a lo Wase -dise ieu Vase- que nos ven de sortir de voses amb l’accent. Bon, se cau pas faire d’illusions, aquel mond nos mantenon dins lo ròtle de comics de la Republica qu’avèm totjorn agut, narbonoïdas abastardits bons solament a faire rire sos usancièrs. Mas es lo Tolosan qu’arribèt primièr dins un sondatge que faguèron, çò que mòstra plan l’espèra dels nòstres. E puòi aquò es ben practica quand montas dins la ciutat mondina que lo tipe la conois coma sa pòcha. I a tanben una peissonièira de Marselha que te tuteja e te ditz de « figura de gòbi » quand fas una cagada dins una giradoira. En mai pòdes telecargar la votz dau Papa de Roma que prèga de longa quand menas. Aquò te dona fisança ! « Mai prèp de tus mon Dieu, mai prèp de tus ! »
Vòls que te diga ? Per la votz dau Papa d’Avinhon, en occitan, dins l’espèra d’una version oficiala, te pòdes enregistrar. Auràs lo bonaür de t’escotar e se jamai t’enganas, de te calar en luòc de cargar lo monde entièr de tas pècas coma fas de costuma !
Enfin, per çò que ne dise, ieu.
La guinhada de l’IEO34. E, rau !
Cap comentari:
Publica un comentari a l'entrada