Un capolièr novèl

La cronica Midi Libre dau Joan Loís Blenet  

 Capolièr es lo nom dau mèstre dels pastres majoraus que son eles tanben bailejaires daus pastres, pastrons e vailets. Lo Capolièr es tanben lo títol d’aquel qu’es au cap dau Felibrige, lo movement mai ancian d’aparament de la lenga nòstra. Lançat en 1854 per Mistral, ne foguèt lo primièr Capolièr, e portat pel succès bèl de son òbra, foguèt per ela la debuta d’un vam novèl de relança e de reconoissença. A la Santa Estela dau 6 de junh en Arle lo venerable Felibrige eligiguèt amb estrambòrd lo Paulin Reynard Capolièr novèl. Es un eveniment vist que pren la seguida dau valent Jaume Mouttet que gardava la Copa dempuèi 16 ans. Es autanplan una bona nòva qu’aqueste 16en Capolier es un daus mai joves, e portarà de segur lo buf e la vòlha de son atge, 31 ans ! Conegut coma cronicaire de France Bleu Vauclusa fa de director de produccion as Coregias d’Aurenja. Lo Felibrige es encara plan important amor qu’incarna la dralha mistralenca de l’unitat de la lenga : « Totes los parlars d’òc son la lenga d’Òc ». Per aquò demòra organizat dins totas las tèrras d’òc amb 6 Mantenenças : Aquitània, Auvèrnhe, Gasconha, Lengadòc, Lemosin e Provença. Amai, s’es estacat a la grafia mistralenca, es plan dobèrt a la grafia classica qu’es la de mantunes Majoraus. Bon vent au Capolièr novèl.
La traduction à retrouver sur Midilibre.fr