Las asenadas dau Joan Pèire

Un òme amb una polida sacòcha jol braç demanda a Firmin :
- Sabètz pas s’aquel camin es comunal ?
- Sabi pas s’es com’un alh o com’una ceba, mas tot lo mond i passa !

-=oOc=-

- Oi, paura Rosalia, veni de veire una aranha qu’èra gròssa, mas gròssa ! Tè pus gròssa que lo ponh !
- Escota, Justina, aquò fa al mens tres milions de còps que te disi que cal pas exagerar !

-=oOc=-

- Tè, Dolfa, assèta-te al cap de la taula !
- Per de qué ieu ?
- Per çò que, al cap de la taula, cal un colhon o un evesque!
- Mas soi pas evesque !
- Es ben justament per aquò !

-=oOc=-

- E vos, sètz totjorn d’acòrdi amb la vòstra femna ?
- Non. Mas o li ai pas jamai dich !