La guinhada de l'IEO d'Erau
sus RÀDIO LENGADÒC
(Picatz sus l'imatge, i tombaretz)
Diga ! Passat ièr siaguère convidat a un bronza-drech sus una plaja
dinamica e m’agradèt fòrça empomadat de perosina, mitan la manada, de me
rastumar lo rable, de pès, coma un Camarga que pren la sòm. Èra quicòm, tot lo
sant-clame, de seguir l’astre lusent, virasolelh demest los autres virasolelhs,
los pès plantats dins l’arena, blanc dau pòrre de matin, rosèla de vèspre… Es
de plànher qu’aquò s’arrèste amb la liberacion. Mas non, galege…
Vòls que te diga ? Per lo
rèire país es çò mèmes, son a passar a un concèpte modèrne de garriga dinamica.
Pro dau caçaire assetat sus un plegant caquí engolit per un cuol coma una tina,
pro dels acampaires de cagaraulas lòng dels valats, pro dau pastre arrucat
contra un euse a l’ombra de la blaca, de las fedas jagudas d’oradas a de reng jos
lo chorrador… Lo mond de la vila nos l’ensenhan, l’avenidor es movedís, « de
vam e d’estrambòrd e l’enavant dei fòrts ». E ja ne vesèm d’aqueles cepons
novèls de l’evolucion que corrisson coma de desmelsats e fan lo trail-running, çò dison. Te manjan
quilomètres, s’arrèstan solament pas per pissar, t’enribanan los aubres e te
pintran los calhaus dels dralhòus per se pèrdre pas dins d’escorregudas
escrologistas de plena natura, una natura que veson solament pas. Enfin, faràn
pas mal als campairòls, als espargons, a las ensaladetas, aqueles, pausaràn pas
la servieta dins la bauca e lo bragalon enflorit. Passan que passaràn, jot la
cairissa, la plaja, mas, chut !
Enfin, es çò que ne
dise ieu.
La guinhada de l’IEO34. E, rau !
Difusion sus l'antena de ràdio Lengadòc
Diluns : dins la matinala (~8h20)
Dimars : dins lo Resson del Vespre (~17h45)
Dimecrès : dins lo Miègjornau (12h/13h)
Dissabte : dins lo Resson del Vespre (~18h20)
Dimenge : dins la matinala (~7h05)
Cap comentari:
Publica un comentari a l'entrada