14 - L’academia francesa
Diga ! Se n’i a que son a la ramassa dempuòi los sègles dels sègles son plan los de la famosa Academia Francesa. A dicha d’arpatejar, d’espepissar, de repapiar, de saique miscroscopizar de miliassadas de viruses finiguèron, au cap de 4 o 5 meses, per afortir que caliá dire dins un francés blos : LA covid-19. Se los àngels an pas ges de sèxe semblariá que siaguèsse pas çò mèmes per aquela diablessa de « virusa » ! Prenguèrem son temps, mas cau dire que quand siás immortal lo temps a benlèu pas la meteissa importància. Ara los omenets verds son a seguir l’abans darrièira mòda e a vendre sos cadierasses que datan dau papeta rance dau rei Cezet. Van saique crompar de sètis en formica que seràn de bon netejar en cas d’incident de sesilha de tot aquel papetum ! Es pas deman qu’aqueles adèptes dau bicòrne e de l’espasa passaràn a la casqueta a la revèrs e a la kalachnikov.
Vòls que te diga ? Seriá benlèu ora que se mainèsson d’obrar a de bon dins son temps parcial eternal e de forabandir de l’esfèra publica la formula òrra qu’ausissèm tot lo sant clame dau jorn de « distancion sociala » per parlar de distància fisica. Encara que, vai te’n saupre ? « È !, òu ! Avèm pas gardat los pangolins amassa ! ». E, tòrna vira, vira tòrna, aquò m’empacharà pas de pensar que se jamai se meton a faire, dins sa Francimandia auturosa, de tèstes de QI puslèu que de viruses, lo nombre de colhons asimptomatics risca d’augmentar fortament. N’i auriá quauqu’unes jos la Copòla que ne seriái pas estonat !
Enfin, es çò que ne dise ieu.
La guinhada de l’IEO34. E, rau !
Cap comentari:
Publica un comentari a l'entrada