PAPIERÒT MENERBÉS (in La Semaine du Minervois, 03/09/20)

 PASSEJADA EN ARIÈJA

Perseguissèm aqueste còp nòstra virada per las comunas d’Arièja qu’an una fòrta potencialitat de dires fins ara amagats e que nòstre ròtle fondamental e primièr es de faire pujar al jorn coma lo solelh lo matin de Sant-Joan sul castèl de Montsegur o coma lo solelh bèl del Gaston Febús !

A Havars, val mai lo bas que lo naut. A Ferrièras, moral de fèrre. A Fois, tot bartàs es bois.  A Hornets, lo pan al forn. A Fogats, mancan pas de fogaças e de fogassets. A Freissenet, tres brancas al fraisse. A Gabre, son braves. A Gajan, se dison Joan. A Galèi, ba fintan tot. A Ganac, auràs las ganas. A Garanon, traparàs pas de gara. A Gaudièrs, seràs gaujòs. A Genat, se geinan pas. A Gestièrs, la cançon de Rotland. A Gorbit, l’informatica al fons del gorg. A Gudàs, de braves gusasses. A Inhaus, nhica-nhaca a la nauc. A Ilhat, plòu sul banhat. A Ilièr, plòu a ramadas. A Justinhac, lo just e la rason. A Labauç, al fons del bauç. A L’Abatut, tot comptat e rebatut. A L’Agulhon, te faràn avançar dreit. A L’Èrm, passeja-te pels camps. A L’Espitalet, te sonharàn. A La Bastida de Besplàs, pausa-te a l’ombra del bèç. A La Bastida de Bosinhac, dins un bocin poiràs nhacar. A La Bastida d’Èrs, tot marcha de travèrs. A La Bastida de Lordat, s’amagan los soldats. A La Bastida de Seron, traparàs de serum. A La Bastida de Salat, agantaràs la set. A La Tor del Criu, tot es al riu. A La Cort, te daisses pas prene de cort. A La Garda, mesfisa-te/ten-te sus tas gardas. A Lanós, cada feda a sa lana. A La Puèja, poiriá èsser pièger. A La Pena, tot val pas la pena/perdràs ta pena. A Larbont, lo lard es plan bon. A Larcat, camina dreit. A Larnat, vai-i arnescat. A La Ròca d’Òlmes, los arbres son de pèira. A La Sèrra, los legums jos la sarra. A Lhassur, lo cèl es d’asur. A L’Avelhanet, lana e avelanas. Al Fossat, lo fòl ba sap. Al Peirat, un ròc e quatre codolets. Al Plan, la còsta puja. Al Puch, la còsta davala. Al Vernet, de flors i an. A Leran, bota-te dins la bona tièra. A Lercol, fai lo babà-cool. A Las Bòrdas d’Arise, al cap de la còrda. A las Cabanas, vacas sens banas. Als Issards, córrer coma un isard. Als Pujòls, tant que pujaràs montaràs. A L’Escoça, degun vendrà a ta rescossa. A Èra Escura, penja ton lum. A l’Esparron, traparàs espargues/esperona ton caval. A Leishèrt, la lait còsta car. A Lesat, mèfi de pas te faire lesir. A Lhordat, plan pesucs los dats. A Liurac, ric-e-rac es patrac. A Limbrassac, lo braç al sac. A Lissac, pòrtan lunetas. A Lorp, l’ostal d’Aularia sens sarralhas. A Lobaut, los lops a cima. A Lobens, los lops an bens. A Lobièras, los lops sus l’ièra. A Ludièrs, vida ludica. A Lusenac, pas de Liga-1. A Madièra, un còp de Madèra. A Malagoda, tot a bon gost. A Malleon, la maire del leon/la maire Dalton. Al Mas d’Asil, traparàs asili. A Manses, demòra-i 24 oras. A Massat, lo quiné passa un còp per setmana. (de seguir)

Terrian-Coratjós Roch