LO TEMPS DE LA DESRASON
Pas aisit d’èsser rasonables en aquestes temps de desrason : anam acabar per virar canturla !
• Los arrestats mobils : Dins una cronica passada, avançavi lo fait de las modificacions permanentas de decision. Sabi pas s’al poder me legisson, çò qu’es de segur es que meton en practica aquel moviment permanent. Lo jorn ont la masqueta venguèt obligatòria per carrièras a París, tot lo monde se deviá emmasquetar. Mas, cap a 8 oras del matin, s’admetèt que los que corrissián (a pè) e aqueles que rotlavan sus una bicicleta, avián pas besonh de masqueta. Dins la jornada, s’ajustèt la possibilitat de se demasquetar per fumar. E aquò en tota logica : la masqueta per esvitar la malautiá, la cigareta per t’empoisonar los palmons. Dison pas se se pòt tubar en rotlant en bicicleta o en corrissent per se gardar en fòrma !
• Lo deputat empegat : Lo deputat de Narbona foguèt director del Pargue Natural Regional de la Narbonesa. Òm lo poiriá pensar sensible a las questions de desfensa de la fauna. E ben non ! Enfins, el pensa benlèu que òc, se l’òm arriba a admetre que los caçaires son los primièrs ecologistas. Lo còp passat, aviá proposat l’interdiccion del VTT los jorns de caça (s’es gardat de proposar l’interdiccion de la caça los jorns de VTT ! ). Lo vaquí ara que se rend a un acamp de caçaires per dire son sosten a la caça al vesc ! Normal : França voldriá menar Euròpa (una vision federala ?), mas a de mal de se plegar a las règlas comunas ! E lo jorn qu’an interdit aquela caça, an autorizat de tirar sus las tortorèlas de mens en mens nombrosas. Vertat que quand n’i aurà pas mai, la question se pausarà pas pus !
• Occitania e Catalunya : La Region se paga unes placards publicitaris bèls per dire al monde de demorar dins la Region. Bon, lo « Restez en Occitanie » es illustrat per una fotografia de Cotlliure. Una polida ciutat que se trapa non pas en Occitania…, mas en Catalunya ! La Region vòl tanben incitar lo monde a venir descobrir nòstras beutats e paga messatges a la television per patronar unas emissions. Mas comprenèm pas tròp la logica quand l’emission presenta Bretanha, Alsàcia o territòris d’oltra-mar. L’autre còp, èra una emission sus Peiregòrd : aquò anava plan, vist que Peiregòrd es occitan !
• La sala d’espèra : Lo còp passat, anèri cò del medecin dels uèlhs. Bon, de matin (9 oras), degun dins la sala d’espèra. La possibilitat de se setar solament sus una cadièra sus tres. Pas de taula refofant de revistas vièlhas : l’impossibilitat de saupre ont n’es la relacion de Charlèna amb Albèrt, se lo Pernòd (???) tendrà fins a 100 ans a la television, se la Craba Bruna a (enfins) aprés a cantar,…; e tantas autras informacions que te’n pòdes pas passar !!! La secretària que respond al telefòn : « Avèm una data liura a comptar d’agost de 2021. ». E, causa novèla, quand vas per partir, te balhan los rendètz-vos venents : un dins 6 meses, l’autre dins 15 meses ! Va venir complicat de tombar malaut en foncion dels merlets de disponibilitat de vòstres metges ! Val mai aver bon pè e bon uèlh !
Sens-Rason Roch
Cap comentari:
Publica un comentari a l'entrada