La guinhada de l'IEO d'Erau
Las estatuas
Diga ! Aime pas de costuma espinchar dau costat de las Americas per saupre ont me cau penjar mon lum, mas deve dire qu’aqueste còp amb la mòda dau desbolonatge de las estatuas son pas per me desagradar, los americans, e quand agache dau costat dau paure nòstre Clapàs me dise que i a d’òbra ! Totes au Peiron, per remandar a París aquel rei que se preniá per lo solelh. Se metèt tres ans per arribar en batèu, vas veire aquò per lo retorn, li pagarem lo Cronopòsta ! Gardem, emai siague pas un Camargue, lo chival qu’es plan polit e que se deguèt sofrir dins los sègles dels sègles de portar lo serenissime tafanari. Tanben, desbategèm lo licèu clemenceau e son avenguda vergonhosa per i metre lo nom de Marcelin ; que Mao se’n tòrna en China se vòu qu’es benlèu el que nos enfectèt amb lo mascolhonatvirus ; que Lenine anèsse préner lo fresc en Siberia, e per De Gaulle : « m’avètz comprés » ! Ai pas res tanpauc contra l’ancian dictator de la vila, mas me pense que seriá mai a son avantatge en pofre, coma faguèron a Seta.
Vòls que te diga ? Tant qu’a i èsser cau passar l’escoba a de bon. Seriá plan d’escampar la molonada de creacions modèrnas que nos gastan la vista. Ane, zo ! au Merdanson los estronts de l’ostalariá Mercuri, las orrors pintradas dau Quòrum, desbranquem las parabòlas e donem a Emaús las cadièiras despalhadas de La Palhada -aquò o caliá faire ! Plantem d’aubres a lor plaça, e pas de palmièrs ! Per finir, enaucem còsta lo restau U dau Crous, enluòc lo donut e la saucissa que i fotèron e que conòrta los estudiants dins lo mal manjar, una escultura de las cranas au Caçolet Trionfant marca d’una Civilizacion milenària !
Enfin, es çò que ne dise ieu.
La guinhada de l’IEO34. E, rau !
Cap comentari:
Publica un comentari a l'entrada