La guinhada de l'IEO d'Erau
Diga ! Ne volètz de pròbas dau desmargament climatic ? Aquí n’avètz, amb, per exemple, Rotland Garròs que s’acaba au mes d’octòbre. La soleta utilitat d’aquel torneg d’esnòbs de las caucetas patriotas, en cauças cortas o jupetas rasapets, èra de dire au mond de las vinhas, de visú a travèrs la tele, lo temps que fasiá amontdaut. Quand ploviá a París, se caliá afanar de sulfatar, Terrau s’anava levar ! Lo Torn de França tanben virèt canturla. Primièr, e aquò es pas maissant, çai venguèt Torn d’Occitania levat d’unas estapas de pas res. De dos, te prenguèt sos dos meses de retard e nos tombèt en plenas vendémias qu’èran, en mai d’aquò, arborivas ongan. Mas francament, quin es l’utilitat d’un Torn de França que servís pas a t’endormir dins la prangièira d’un caumanhàs de julhet ?
Vòls que te diga ? Lo mond partís en mirgola dempuòi que de las sèrras de la reina d’Anglatèrre nos venguèt en 1854 la cendròsa qu’i dison tanben l’oïdium. D’aquí doas consequéncias de las bèlas, los bledarabièrs d’ubac se placèron per faire d’alcoòl amb son sucre que i aviá pas pro de vin e nos fiquèron lo pè au cuol que desencadenèt 1907. E de dos, siaguèt lo primièr tractament fitosanitari qu’enfectèt la vida de nòstres papetas rances. E sofrir de sofrar ! E puòi de la flor de sofra nos faguèron passar a de la poison modèrna, sistemica, radicala. Me tuguèron lo papà e sos companhs d’escòla, me tuguèron lo cosin primièr, me tuguèron l’amic Janòt…
E ara i sèm mai, per faire plaser a sos amics bledarabièrs, l’assemblada nacionala nos vòta lo retorn dels neonicotinoïdes ! Sabètz la dicha : « Los òmes e las abelhas morisson, las bèstias crèban. » Las bèstias e los bestiasses. Que crèben doncas aqueles 313 deputats que faguèron passar aquesta lei !
Es çò que ne dise ieu.
La guinhada de l’IEO34. E, rau !
Cap comentari:
Publica un comentari a l'entrada