La cronica Midi Libre dau Joan Loís Blenet
Se la situacion de la lenga nòstra es plan marridassa vesèm de signes que manifestan un cambiament positiu de vejaire de l’opinion. Avís de cambiaments per la lenga nòstra. De segur sèm encara dins lo trauc a luchar « contra subèrna » e per la part màger dels decideires, sens ges de futur. Pasmens, pasmens, qualques signes fan vesidor un cambiament prigond de vejaire per l’occitan. Es un movement lent que se fa dempuèi qualquas annadas. La jornada d’accion dau collectiu Per Que Viscan Nòstras Lengas capitèt plan. En resson d’aquesta, lo Francis Cabrel diguèt son sosten a Antenne 2 e lo tornèt afortir dos jorns aprèp. Un autre signe mai espantant ven dau sénher Tirole, lo Nobel francés de l’economia. Bailejèt lo trabalh d’una còla d’especialistas de gròs grun per pensar l’avenidor de Tolosa pertocada qu’es per la crisi de l’avion. Aquesta còla saberuda menada per lo « pontife » de l’economia sortiguèt un plan de 11 punts. Figuratz-vos qu’un d’aquestes es «Valorizar la lenga e la cultura occitana ». Sens èstre « tirolatre » vaquí un avís que tinda diferentament de çò qu’ausissèm de longa. Autre ventolet benvengut : l’enquèsta menada per l’OPLO per las 2 Regions, Occitania e Aquitània Novèla. 92 % de la populacion vei favorablament la lenga-cultura occitana e son a 80 % per mai d’accion publica per lor donar d’avenidor ! Lusidas d’espèr dins la negra lucha que nos mena lo Blanquer, sinistre de la diversitat.
Traduction à retrouver sur Midilibre.fr
En audio sus Ràdio Lengadòc. Picatz sus l'imatge e i arribaretz.
Cap comentari:
Publica un comentari a l'entrada