sus RÀDIO LENGADÒC. (Picatz sus l'imatge, i tombaretz)
Diga-me coma te dison e te dirai quau siás ! Aqueste còp tocam lo fons e bevèm a la taça granda, lo municipi dau Clapàs ven de vendre lo nom de la piscina olimpica a un promotor immobiliari, saique per lo grandmercejar de l’arrancatge dau vinhal e dau betonatge de la còsta e dau rèire país ? E lèu, anatz veire, lo tipe serà estatuficat a la Rodin, en cagaire greco-roman, per vos aculhir quand davalaretz dau tram… « Estacion venenta : lo grand cabús dins la vergonha ! » Nos aviam ja fach lo còp, los de Marselha, amb l’estadi « Irange- Velodròma », Irange, Ò desespèr ! e lo rugbi clapassièr fa d’annadas que fa la puta amb l’Altrad estadium vengut ara GGL estadium que cambiam ongan de macarèl.
Vòls que te diga ? Apèlan aquò lo « naming », en anglés es brancat e saique mens dolentós, lo bon pòble lo sentirà pas passar, mas coma disètz vautres de quauqu’un que vend son trauc mai bèl al mai disent ? Es de putassariá pas mai. Bon, ajatz pas páur, los elegits nos raseguran : « Causissèm societats que partejan las valors que portam. » E ta tanta Nina, son polidas las valors ! Basta de faire sonar tin-tin las pistòlas e anatz veire espelir « L’Amazola per la mediatèca Amazòna-Zola » ; l’opèra « Miquèl Jackson-Berliòz » ; la fac de drech Patric Balkani e la Manejament School Carlòs Ghòn ; la mairala Nestlé o lo licèu agricòla Monsanto e tant qu’a faire la puta, aniretz lèu manjar un shitburger plaça de la « Macomedia » amb per vos aculhir en luòc las tres Gràcias, qu’i disèm au Clapàs las tres Petetas, lo palhassa Ronald.
Mas per çò de l’olimpisme ges de laguis, aquí es nòstre onor, aurem la medalha d’aur de l’engana e de la falsetat. Es çò que ne dise ieu…
La guinhada de l’IEO34. E, rau !
Cap comentari:
Publica un comentari a l'entrada