La cronica de l'Alan Roch es sus ràdio Lengadòc, en picant sus l'imatge i tombaretz.
Sabèm pas mai ont se trapan las frontièras entre lo mond real (coma se las gens soetavan un monde real : ieu, per exemple, soi mai favorable a un monde barça – encara que d’aquesta passa…) e lo monde virtual que ganha totes los parçans de la vida vidanta. Aquò nos mena a unas soscadissas filosoficas dins una amira platoniciana o socratica.
• Dança virtuala : Una associacion limosenca, que pòt pas mai organizar dempuèi una annada son balèti mesadièr, prepausa ara un talhièr de dança en virtual. Per faire la farandòla a distància va èsser un pauc complicat !
• Pas solament a tocar : Òsca al club de Vilagalhenc-Argon e a l’Ostal dels Joves de Carcassona qu’organizèron estagi pels dròlles de rugbí de 13 del temps de las vacanças de febrièr. Una brava pròva de volontat e d’imaginacion per capitar sens jogar sens se placar ! Te demandan de te lavar las mans de longa, mas aquí es interdit de prene la docha aprèp la bona susada !
• Campionat de luènh : Pareis que, fàcia al nombre de partidas anulladas en rason del virús e d’un calendièr pas possible de preveire, la Federacion dels XIII envisatjariá d’organizar los rescontres a distància. Francament, non : lo rugbí en jòga-estacion (en francés : play-station) va pas èsser tarrible !
• Pitagòra e lo milh : Lo paure matematician Pitagòra se carcanhariá bravament per trapar la solucion a l’eqüacion seguenta : « Dins la mesura ont l’utilizacion de glifosata deu demesir de mitat sul territòri francés d’aicí 2025 e qu’a l’encòp unes agricultors (aquí, important de pas utilizar lo mot : païsan !) ne profitan per n’utilizar un quart de mai cada an, podètz dire quora aurà desaperegut la darrièra abelha ? ». Esperam una responsa genre [(100/2) + (0,25 x 5)] = y (o : y2?)
• Non a las AG virtualas : Per de rasons legalas, las associacions tenon lor Amassada generala, mas del biais virtual : vòte per corrièr, vòte per Internet,… e es plegat. Los mai valents an dreit a la visioconferéncia, de còps interactiva. Apelatz aquò una AG ? Bon, dins plan d’associacions tot lo monde ditz de Òc al rapòrt del president, als comptes financièrs que s’i compren res (mai que mai s’es un comptable que los presenta), als vòtes lèu plegats : « Qual es contra ? Qual s’absten ? Anem, va plan : adoptat a l’unanimitat ! ». Vas pas alongar l’acamp amb unas questions que te tafuran que sabes que cal pas retardar l’ora de l’aperitiu o del repais. E que l’interès bèl d’una AG es endacòm mai : veire los autres aderents dins lo moment non-formal ; es aquí que s’escambian las informacions importantas ; que se rassega lo president o la presidenta (que se’n crei), lo Burèu (que s’acampa de restaurant en restaurant), e que ieu ai una idèa… A ! perqué pas ? E se ba fasiam… Blanc o muscat ? ; me pòdes passar l’anchoiada (o los acràs) ! Ensajatz de passar una lesca entapenada per Zom… me’n diretz de novèlas.
Envirtualonat Roch
Cap comentari:
Publica un comentari a l'entrada