Alèrta ensenhament

L’avantatge de la ronda das ministres es que los marrits duran pas. Nimai los bons, diretz. Segur, mas lo marridum es mai frequent, e un michant que dura es un patiment renfortit per d’annadas. Per las lengas autoctònas, lo qu’avèm ganhat dins lo paquet suspresa de 2017, marcarà son temps coma un destructor caracterizat. A per escais Rond-Up e aquò ditz plan lo ben que vòl a la diversitat biolingüistica nòstra. A un biais curiós d’aimar la diversitat. Per las lengas estrangièras n’aima qu’una, que la fa obligatòria. Per las autras lengas las considèra (un pauc) quand son mòrtas. Amb la Lei Molac mostrèt plan son ostilitat per las nòstras e arroïna lor ensenhament. O fa amb la reforma dau Licèu que las marginaliza encara mai sens gaireben de valorizacion au Bac. De segur amb una oferta marridassa la demanda s’estanca. En 2 ans los efectius liceans an cabussat de 50 % per totas las lengas regionalas. L’ensenhament es una cadena que cada anèl fa téner lo tot, e per la trencar basta de voidar un nivèl. Sens liceans i aurà pas d’estudiants, dau còp pas pus de professors, ect… Es d’aqueste negrum a venir que nasquèt lo collectiu Per Que Visquen Nòstras Lengas. Crida fòrt ara a una jornada d’accion lo 29 de Mai per l’avenidor de nòstra istorica diversitat culturala. Es aquò tanben l’ecologia !
Traduction à retrouver sur Midilibre.fr