Lo Canal de Riquet

 Fasiá de temps que me disiái : «  Boby, te caldrà faire lo Canal de Riquet a bicicleta ! ». Mas pas tot solet !

Ne parlèri a un amic, Pèire*, que foguèt d'acòrdi.

Partiguèrem de Massilhan ( Onglós ) fins a Tolosa, en 4 jorns, 240 km, del diluns primièr fins al dijòus quatre  d'octobre de 2018.

Lo primièr ser estapa a Capestanh, Patrícia* e  Enric*, d'amics  nos lotjaràn. Per los autres sers, cambras d'òstes a Marselheta e Avinhonet-Lauragués.

Retorn, en trin de Tolosa  fins Seta.

 

Primièra estapa, diluns 1 d'octobre : Marssilhan (Onglós)-Capestanh :

Miquèla*, la femna de Pèire, nos carreja fins los Onglós . Fotòs abans de partir !

Prenèm la pista, mas trapam pas lo camin del canal ! Commença plan ! Arribam sus la rota nacionala, trapam una pista ciclabla, direccion Agde ! Es plan drecha e longassa aquela pista! Lo vent  bufa , e l'avèm dins lo nas !!!

Agde. Ges de pista ciclabla. Fin finala, trapam lo canal e l'enclusa redonda. Fotòs.

Lo camin lo long del canal es pas aisit : èrba nauta, gròssas carrals e totjorn aquel vent  !!

Es dotze oras e mièja. Nos arrestam per manjar un bocin, del costat de Vias. Puèi tornam pedalar. De barcassas passan, fasèm un signe de la man.

Vaquí l'obratge sul Libron (pichòt flume còstièr) per canalizar los aigats. Plan fach. Fotòs !

D'un còp, a man esquèrra, de buòus plan negres  dins un camp! Sèm cerca de Portiranhas.

 Cap a Besièrs. Lo camin es de bon rotlar, enquitranat.  Aquí La « Cameron » usina de martelièras pel petròli. Estadi de  Sauclières ! N'ai vist mai d'una partida de rugbí dins las annadas setantas, ieu Besierenc de naissença! (A.S.B. :11 còps campions  de França de 1961 fins 1984 ).

Ara, passatge sul pont canal, fach per evitar los aigats d'Òrb, a las barcassas.

E d'un còp las 9 enclusas de Fonseranas! L'engenh de Riquet ! Fotòs de segur !

Contunham. Lo camin es pas aisit : rasigas,vent !!!

Colombiers e lo polit pòrt, puèi lo tunèl del Malpàs, fach en una setmana solament ! Fotòs.

Cap a Poilhes, puèi  Capestanh ! Ostal d'Enric e Patrícia. Avèm fach 60 km. Bevèm un còp, e a la docha ! Boti una camiseta de Macarèl : « L'as volguda la bicicleta, ara pedala ! ».
Aperitiu, repais de « Rei » puèi al leit que deman se cal levar ! (de seguir...)

*noms cambiats.

 

Segonda estapa : Capestanh-Marselheta-dimars 2 d'octobre.

Quin dejunar ! Mercé plan Patrícia, Enric ! Son 8 oras un quart. Lo canal serpenteja. Polit! Encara un pauc de vent ! Fasèm una quinzena de km, sèm arrestats : abatatge de las platanas malautas. Podèm tornar pedalar mas cal daissar lo canal pendent 6 km (rota departamentala).

Arribam sus lo canal, sèm sul canalet de « La Robina » (de Narbona fins Pòrt-la-Nòva), viram  a drecha, lo canal de Riquet es a 500 m.

Leù, sèm al polit vilatge del « Somalh ». Son 12 oras e mièja. Cercam un restaurant. Pèire a crebat, ròda de davant. A leù repairat puèi trapam un pichòt restaurant plan agradiu. Menut: merluça fresca amb ris-cervesa de barril-cafè. Va plan, podèm tornar sus la bica de montanha !