LOS MARCIANS SON OCCITANS !
Del temps que lo Pesquet vira, un còp de mai, los Occitans devèm portar testimòni d’unas evidéncias, que las estructuras scientificas, astronomicas, astrologicas e autras an decidit de nos amagar. Fa gaire vos contèri los ligams establits entre Lengadòc e Mars : los viatges de la Germana cap a la planeta amb las panièras refofantas de pastas de Vilaspin, los enregistraments de virada del cèrç.
Vaquí que s’i ajustan ara las constatacions de la NASA (que son sèti se trapa a Brageirac, en sovenir del Ciranò que lo monde disián : Qun nas a !). Los geològs de l’agéncia especiala e espaciala constatan que se trapan aval luènh las meteissas pèiras e los meteisses minerals qu’en Peiregòrd. E atal, an decidit de balhar a las pèiras trapadas de noms de localitats del país : Sòrges, Limeirac, Biràs (fr : Brantôme), Tortoirac (ont cantan las tortoras), Sieurac de Peiregòrd, Sieurac de Rabairac, Rabairac.
Arrestem-nos un moment sus aquela referéncia a Rabairac. Sabètz totes que lo Mans de Breish (e se ba sabètz pas, l’anatz aprene) interprèta una cançon que conta una serada ont se produsiguèt a… Rabairac. La conclusion es clara coma d’aiga de Lauquet : Mans de Breish es un extraterrèstre e son escais vertadièr es Breish de Mars. Demòra ara de saupre perqué lo mes de març es favorable als bruèisses. Benlèu que son en capacitat de desencadenar las marcejadas e de tornar a la jaça los Vacairals ! D’unes pensan que lo Pesquet va montar sus Mars per faire lo pescafin e s’emplenar la garbusta de peisses d’abril. Demòra pas mai que de li fisar un gos trufaire de Vilanòva o de Cabrespina e que nos torne amb un panièr de trufas negras marcianas (Lo bon farç se prepara amb trufas de Mars/març) ! Ja que Març es una planeta roja coma un vin (carinhana o granacha) de Menerbés ! Roja coma l’alba novèla de la victòria del proletariat presicada per Karl Març !
Un temps se creseguèt qu’amont-naut unes canals d’irrigacion corrissián long d’espandidas deserticas bèlas, emplenats d’aiga venent del desglaç de las calòtas polaras. Aquela ipotèsi es ara abandonada. Perqué ? A la demanda de l’Ofici de torisme de Besièrs e de las VNF. Aquò auriá mostrat que la legenda de l’idèia venguda d’un còp luminosa en se passejant dins Montanha negra e en trabucant sus un codolet de riu del Riquet per se lançar dins la construccion de son canal èra bufèca. De fait, d’amagat, èra anat faire un ensag sus Mars : aquí la vertat vertadièra !
Dels Marcians, se ne coneis ja lo nom de quauques-uns : los fraires Març que se disián Chico, Harpo, Groucho, Gummo, Zeppo. Mas qual.a nos pòt dire los pichons noms dels 26 (doas equipas de XIII : un signe ?) autres ?
— Pensatz que los Marcians (que pòrtan un Marsupial - desconegut en Australia - sul malhòt coma emblèma) son en capacitat de remportar ongan la Copa de las 9 Planetas ?
— Pensi qu’aquò dependrà de lor mesa al verd !
— Mas perqué aqueste Papieròt es pas titolat : « Los Occitans son de Marcians » ?
Mars-Upilami Roch
Cap comentari:
Publica un comentari a l'entrada