Variants

 La guinhada de l'IEO 34 ! d'escotar sus RÀDIO LENGADÒC. (Picatz sus l'imatge, i tombaretz)

               Diga ! De l’eficacitat dels vaccins contra los variants, l’agéncia europenca sanitària comunica : amb la redobertura programada de las discotècas, los festejaires son convidats a portar particularament atencion au variant Travolta que dona lo dançum e encara e totjorn fèbres los dissabtes de ser. Se deurem mesfisar tanben dau variant soissa que demòra neutre qué que siagan los tèstes emplegats : pcr, antigenicas emai serologics. De pas creire tanpauc çò que se ditz dau variant dau Benin que seriá pas tan benigne que çò que semblava.

L’agéncia se vòl pasmens rasseguranta dau costat de las Americas, lo variant colombian seriá pas mai que podra als uòlhs e l’espelida d’un variant jamaïcan deuriá, dins pas gaire, venir apasimar e destesar l’ambient… E s’aquò vos conven pas, traparetz sus internet recèptas per fabrejar vòstre variant a l’ostau, un variant ecologicament responsable e de qualitat, amb de sabon negre e de vinagre d’alcoòl.

Vòls que te diga ?  Mèfi, mèfi… Passère ieu per l’escòla dau rugbí que fa jurisprudéncia. Se, segon las sasons e amb dificultats podèm mestrejar un variant anglés serà pas la meteissa cançon amb lo variant sud african, vos o dise ! E per pauc que los neozelandeses metèsson sa pelha a la bugada e nos faguèsson un variant Tot-Negre, All-Black, i passarem totes !

Mas, aürosament que lo govèrn de França a encara e totjorn la solucion. Los especialistas de la còsta plena relèvan que dins las temporadas de consultacion electorala i a pas ges de dangièr per l’elector, tanpauc de virus que tenga per empachar las votacions. Doncas, venon de decidir d’estaloirar las eleccions dels 700 000 elegits dau país, au long de l’annada, un pauc cada jorn…

Visca la Republica, visca la França.

 

Enfin es çò que ne dise ieu !

 

La guinhada de l’IEO34. E, rau !