La Guinhada es sus ràdio Lengadòc. En picant sus l'image i tombaretz.
Diga ! N’i a que se’n tornan de la plaja das Esquièrs e d’autres d'Euro Disney, dau Puòg dau Fadat o d'un estagi de parapenda en Vendèa, d’unes encara se paguèron una setmana romantica dins un igló auvernhat, participèron a de partidas de concors de campionat de petanca assetada o joguèron als quatre cambajons sus lo teulat de son ostalariá dau Nat 2000…
E los vendemiaires de vendemiar lo pauc de rasims que la jalada daissèt, los presidents de far las fièiras de las assos e los tòca-coides per cercar candidats a l'occitanizacion, los clavaires de se’n anar en formacion de comptabilitat a co dels Balkanys per emplenar lo dorsièr venent de son Total Festum…
Vòls que te diga ? Anère ieu préner lo fresc dins aquelas montanhas que tan nautas son e dins aquel temps me n’arribèt una. Figuratz vos qu’ai lo vesin -un malsapiós de primièira- que nos fiquèt quatre pets de fusilh sus una familheta de singlars que ressopavan dins son òrt. E veja-aquí mon chin que t’agantèt la petarosta e que s’enfugiguèt per lo vilatge, e la forrièira que se me l’embarquèt a Magalona, còsta ton clavaire tornat de son estagi e embarrat de l’autre costat de la rota per faussas facturas. Òmes e chins, dins la meteissa saca, anirem totes a Magalona ! E, aquò s’inventa pas, es un tenement au pè dau tuc de Miraval que se ditz lo « Cairat dau Rei » !
Mas, mai fòrt que lo rocafòrt ! Aval a la forrièra me piusèron lo chin qu’èra ja plen de nièiras. E ara per ara mancan de piuses per sas veituras, sos esmartfònes e sos consoladors electronics. Te fiquèt un pati ! Desmissionèron la directritz de la societat aparaira dels animals que se’n prenguèt a la presidenta, se parlava pas que d’aquò sus la Comedia…
Ieu, me’n tornère au vilatge, sens pretentcions, amb lo chin mas lo pòde pas pus préner als campairòus. Ara que me l’an piusat, vòle pas que lo mond sapián mos cantons a girilhas…
Pas colhon !
Enfin, es çò que ne dise…
Cap comentari:
Publica un comentari a l'entrada