La cosina de ma maire

L’UÒLH DEL BUÒU

LA BILHETA DE L’IVONA DEL CERCLE OCCITAN DE MÈSA.

 

♫ Omenatge a G.BRASSENS.

Coblet N° 7 de la Suplica.

 

Es aqui qu’un còp, a quinze ans revoluts,

A l’atge ont s’amusar tot sol sufís pas pus,

Coneissiá la prima amoreta

Cèrca d’una serena, una femna-peis,

Recebiái de l’amor, los primièrs conselhs,

Engolissiá la prima arèsta.

 

              §§§§§§§§§§

 

LA COSINA DE MA MAIRE.

Se caliá li bailar un nom, ieu l’apelariái « La cosina a vista de nas ».

En la primièra mitat del sègle XX, se cal rementar qu’i aviá ges de « minutariá », talament que lo nom occitan existís totjorn pas, ges de placa vitroceramica o a induccion, ges de forn micro-ondas, ges de robòt, de mandolina,  encara mens de « blender » e tot aquò.

Pasmens, la cosina, que preniá fòrça temps, èra gostosa de las gostosas, amai deliciosa. Nòstras maires se mancavan pas jamai !

L’ivèrn, sus la cosinièra a carbon, puèi a mazot, los plats aprestats amb amor se confissián doçamaneta, en deslargant d’odors apetissentas, que encara uèi, vos venon careçar las narrilhas e las papilhas, pas que de ne parlar.

De còps, dins la chiminèia, la maire fasiá còire, al fuòc de bròcas tiradas d’un gabèl de vinha, una tindèla de buòu de la bèlas, e quand podiá descrocar lo bocin del boquièr, lo mancava pas ! Aquò èra totjorn acompanhat d’un platàs de fritas plan grassasàs, que tant ne’n fasiá, tant se ne manjava. De fes, sus la grasilha èra un redond de saucissa de La Cauna, aquela qu’es totjorn fòrça emplegada per farcir de tomatas, de merinjanas, et subretot de muscles.

L’estiu de bèls vairats o de sardas de Mediterranèa, venián acabar lor vida sus aquelas grasilhas, o a la padena. Jamai de peisses de l’ocean, qu’era luènh, luènh… e i aviá pas de refregidors dins los ostalses e de camions frigòs sus las rotas. Èra complicat per la conservacion. De fes las nolors ne’n disián long ! Donc pas question qu’aquel peis trespasse lo sulhet de l’ostal, e la maire disiá « çò melhor del peis, es l’uòlh » (un pauc coma lo de nòstre Buòu). Sembla que los uòlhs dels peisses de l’Atlantica li agradavan son gost.

Lo talhièr de cosina del Cercle occitan « Lo Buòu » s’es inspirat d’aquela cosina d’aicí mai que mai, mas tanben  d’ailà e a confeccionat un fum de recèptas tan bonas que fan le plaser efemèr de tota la còla. E s'aquò es pas servit dins las siètas de Gargantuà, pauc se'n manca, e son totjorn plan comolas.

E ieu comenci de compréner per de qué los Vièlhs dison totjorn : èra melhor abans, qu’ara de mai las siètas son grandas, de mai las porcions son magras…

 Aquelas recèptas son estadas escrichas, puèi revistas e corregidas per lo Sénher Jaumet que presentam pas pus. Per ara dormisson dins los ordinators.

Mantunas podrián figurar dins lo blòg de l’IEO coma foguèt prepausat a sa darrièra amassada. Demòra que caldriá trapar qualqu’un que s’i volguèsse pegar per las picar o repicar, e las envoiar a l’IEO. De qué ne disètz, amics lectors ? De seguir.

Ivona BEAUME.

Mèsa, lo 17 de novembre de 2021.

 

♫ Hommage à G.BRASSENS.

Couplet N° 7 de la Supplique.

 

Et c’est là que jadis, à 15 ans révolus.

A l’âge où s’amuser tout seul ne suffit plus,

Je connus la prime amourette.

Auprès d’une sirène, une femme poisson,

Je reçus la première leçon

Avalé la première arête.

              §§§§§§§§§§

LA CUISINE DE MA MERE.

S’il fallait lui donner un nom, moi je l’appellerais « La cuisine à vue de nez ».

Dans la première moitié du XXème siècle, il faut se souvenir qu’il n’y avait pas de minuterie, au point que le nom occitan n’existe toujours pas, pas de plaque vitrocéramique ou à induction, pas de four micro-onde, pas de robot, de mandoline, encore moins de blender, et tout le reste.

Pourtant, la cuisine, qui prenait beaucoup de temps, était goûteuse, et même délicieuse. Nos mères ne se rataient jamais !

L’hiver, sur la cuisinière à charbon, puis à mazout, les plats préparés avec amour mijotaient tout doucement, en laissant s’échapper des odeurs appétissantes, qui encore aujourd’hui viennent vous titiller les narines et les papilles rien que d’en parler.

Parfois, dans la cheminée, la mère faisait cuire, au feu de bûches tirées d’un fagot de vigne, un beau morceau de bœuf, et quand elle pouvait décrocher le morceau du boucher, elle ne le ratait pas ! Cela était toujours accompagné d’un grand plat de frites bien grasses, et tant elle en faisait, tant il s’en mangeait. D’autres fois, sur le gril c’était un rond de saucisse de Lacaune, celle qui est toujours très utilisée pour farcir des tomates, des aubergines, et surtout des moules.

L’été de beaux maquereaux ou des sardines de Méditerranée, venaient finir leur vie sur ces grils ou à la poêle. Jamais de poisson de l’océan qui était loin, loin…et il n’y avait pas de réfrigérateur dans les maisons, ni de camions frigos sur les routes. C’était compliqué pour la conservation. Il arrivait que les odeurs en disent long ! Donc pas question que ce poisson franchisse le seuil de la maison, et la mère disait « le meilleur du poisson, c’est l’œil » (un peu comme celui de notre Bœuf) ». Il semble que les yeux des poissons de l’Atlantique n’étaient pas à son goût.

L’atelier de cuisine du Cercle occitan « Lo Buòu » s’est inspiré de cette cuisine surtout d’ici, mais aussi d’ailleurs, et a confectionné un grand nombre de recettes si bonnes qu’elles font le plaisir éphémère de toute l’équipe. Et si cela n’est pas servi dans les assiettes de Gargantua, il s’en faut de peu, et elles sont toujours bien remplies.

Et moi je commence à comprendre pourquoi les Vieux disent toujours : c’était mieux avant, car maintenant, plus les assiettes sont grandes, plus les portions sont maigres…

Ces recettes ont été écrites, puis revues et corrigées par le Sieur Jaumet, qu’on ne présente plus. Maintenant elles dorment dans les ordinateurs.

Quelques unes pourraient figurer dans le blog de l’IEO, comme il l’a été proposé à la dernière assemblée générale. Il reste qu’il faudrait que quelqu’un veuille s’y coller pour les taper ou les retaper et les envoyer à l’IEO. Amis lecteurs, qu’en dites-vous ? A suivre.

Yvonne BEAUME.

Mèze, le 17 novembre 2021.