Escaisses

 Mescladís, de Bobí lo Contejaire. (Robèrt Pastor) Cada dijòus dins Midi Libre, Pays coeur d'Hérault, edicion de Lodèva.

I a dins « còr d'Erau » de tièras d'escaisses de personas mas tanben sus los noms dels  vilatges.

 De « Sauta-ròcs » dins còr d'Erau se'n trapa mai d'un : Sant Guilhem del desèrt, Cabrièra, Moresa, Tressan...

Mas per Octon avèm  los « Sauta-rufa », la rufa aquela tèrra plan roja.

Sant Andrieu de Sangonís : Los pòrcs negres (veire la legenda).

Aniana : « Los Innocents ». Vaqui una legenda : Un còp èra, dos joves foguèron acusats d'aver raubat de galinas e de conilhs per festejar amb d'autres. Foguèron jutjats a Lodèva. E tot lo long del camin diguèron : « Sèm d'Aniana e sèm innocents, sèm d'Aniana e sèm innocents ! » Dempuèi aquèl escais es demorat. E la fèsta del vilatge es lo 28 de decembre, jorn de la Sant Innocents !

Los escais de personas . Aquí es mai d'un còp risolièr coma : Manjaceba, Tocamanetas , encara un que vòl estre elegit !  Fadat. Lo repotegaire, un qu'es jamai content o lo mut, un que charra tota la jornada, parlariá a una paret !  

Sus lo fisic :  Lo Garrèl, lo pelat, ges de pelses sul cap ! Grandàs o pichonet.....

E sus la natura, bèstias e plantas : Lo singlar o lo buòu  son d'òmes plan fòrts ! Lo mèrle, lo perdigal.... Vaqui una istòria amb lo perdigal.  A Colhonas, vilatge de Batiston, i aviá  un caçaire de primièra e sobretot, caçaire de perdigals. E parlava totjorn de caça e de perdigals. Comprenètz que son escais foguèt lèu trapat : Lo perdigal ! Mas aqueste òme aimava pas los escais !

Un jorn, la maire de Batiston li diguèt : «  Te cal anar en ço del Perdigal, per i portar aquelas figas ! ». E Batiston partiguèt cap a l'ostal del Perdigal. Aquel parlava amb un amic davant la pòrta . «Monsur lo Perdigal, monsur lo Perdigal, vaquí de figas ! » D'un còp, lo Perdigal, se virèt, roge coma una poma d'amor mai que madura e cridèt : « Pichon, me sonas pas lo Perdigal, mai monsur Castelbèl ! » . Batiston tombèt las figas e partiguèt lèu, lèu cap al sieu ostal !

E cric e crac mon conte es acabat.

Adieu brave mond, al còp que ven e portatz vos fièrs !

 Robèrt Pastor escaissat Bobí lo contejaire.