Sortir, escotar, gaitar, veire, legir…
Las associacions ensajan de tornar prene lo fial del temps e dels rescontres. Lo distancial o lo morre suls escrans pichons e grands, aquò va plan un temps ! Aprèp la virada capitada de Salvatges e lo debanament a voses multiplas de la Setmana de la Paraula, l'IEO-Aude se trapa a pè d'òbra sus dos autres moments fòrts de mesa en abans de la lenga e de la cultura d'Òc. Aquí unas datas que vos cal pas mancar de notar e de faire virar. Reservatz vòstras seradas e vòstras fins de vèspre !
• Quinzenada Trasmetre a Limós : Per
una lenga e una cultura, la trasmission de generacion en generacion es
una necessitat per la perennitat. Las lengas minorizadas patisson de
trencaduras subidas e impausadas. La soscadissa sus aquelas questions es
al còr de la quinzenada que se tendrà a Limós fins al 4 de decembre. Se parlarà del ròtle del conte ; per la lectura, se celebrarà las lengas e se respondrà a la question : Perqué m'an pas dit a l'escòla ? (dijòus 25, en serada). Dos films-documentaris de Patric La Vau passaràn lo divendres 26 de ser al cinèma : Lenga d'amor e L'escòla en occitan. Un jornalista del Monde Diplomatique alargarà
la question amb una conferéncia sus la biodiversitat linguistica en
dangièr sus la planeta (divendres 3/12, en serada). Mercé a l'ATP, una representacion de la pèça Trans(e)-Maître(s)
• Bodon-101 ans : Lo grand escrivan occitan Joan Bodon nasquèt lo 11 de decembre de 1920 a Crespinh (Avairon). A Carcassona, la commemoracion del centenari de sa naissença se remandèt d'un an. Se dobrirà a la Mediatèca Grain d'Sel aqueste dijòus 25 (18h) amb una presentacion de sa vida e de son òbra. L'Ostal Sirventés aculhirà una mòstra del plastician Didièr Mir consacrada als Contes del Drac (estrena : diluns 29, a 18h30 ; rescontre amb l'artista, l'endeman a 18h30) e una conferéncia sus la plaça de l'Istòria dins l'òbra de Bodon (diluns 6/12, a 18h30). Una sesilha de contes serà proposada al jove public, lo dimècres 1èr de matin (10h, Grain d'Aile). Classas poiràn vistalhar la mòstra o reçaupre un contaire. Per un final en beutat, lo divendres 10 de decembre, a la Fabrica de las Arts (18h30), lo Mans de Breish cantarà los poèmas de Bodon de Jorn de fièra en Ser de fièra, Sus La Talvera per celebrar Los Carbonièrs de la Sala, semenarà l'Èrba d'agram e, contra-subèrna, pensar : « Sabi qu'aquel jorn vendrà : l'Alba d'Occitania ». Una trufada clavarà la quinzenada (25 € ; se marcar : ieo11@ieo-oc.org).
Tornats a l'ostal, reprendretz o descobriretz aqueles libres pivelants e importants : La grava sul camin, La santa-Estèla del centenari, Lo libre dels Grands Jorns, Lo libre de Catòia, La quimèra e vos demandaretz quala seriá estada la fin de Las domaisèlas…
Pè-levat Roch
Cap comentari:
Publica un comentari a l'entrada