Aquesta dimenjada s’acaba la Setmana das Lengas Regionalas de France-3. Es un eveniment bèl e una primièra per nòstras lengas istoricas e autoctònas. De segur, d’unes faràn la bèba en repotegant que, creada en 1972, la cadena das regions lambinèt bravament per s’avisar d’aquesta riquesa e i dedicar un eveniment nacionau. De segur aquò’s vertat, mas coma se ditz, tant val tard que pas jamai. Alara òsca d’aver una programacion publicitada e, enfin grands dieus, la valorizacion daus magronèls programas en lenga nòstra. Seriá plan de n’aprofiechar per los botar a d’oras un pauc melhoras. Pensatz que lo nòstre « Viure al país » lo difusan lo dimenge de matin a 10h50 e dempuèi gaire lo dimècres a 10 oras ! Aquesta Setmana es tanben un signe, lo d’una evolucion ara plan neta de l’opinion per aquel sicut. D’aquestas emissions citam per nautres lo documentari de Marc Khanne « Occitan Gardarem la Lenga » qu’es plasent e se vei coma un filme. Tot aquò se pòt tornarmai veire mercés a l’internet. Demest tot çò prepausat, una charadissa titolada « Un avenir possible per las lengas regionalas ? ». La responsa es la meteissa que per l’avenidor de l’aucelilha, de la diversitat biologica e dau clima. De segur, se contunham coma aquò miladieus i aurà ges d’avenir e, per la Tèrra, un futur sens nautres.
Traduction à retrouver sur Midilibre.fr
Cap comentari:
Publica un comentari a l'entrada