• President : Te dobrissi lo jornal e te vesi qu’es lo candidat d’esquèrra que s’es ganhat la presidenciala. Òu ! An cambiat lo calendièr sens m’avisar ? O me soi endormit una mièja-annada (o cent ans coma l’autra dins son bòsc atupit) ? Non, a i gaitar de mai proche, aquesta victòria es pas en França, mas al Chile. Lo pòble unit jamai serà vençut…
• La coalicion : Aval, luènh, una coalicion portaira d’esper que ramosa del centre-esquèrra als comunistas per un vam democratic novèl. Aicí, la desunion complèta amb la candidata suplementària qu’al crit recampaire-esparpalhaire de l‘union rajusta un culhierat de desunion… S’èrem daltonians, capitariam de barrejar lo verd e lo roge en plaça d’esperar contra subèrna l’arribada d’un(a) Astre Astruc (en fr. : Lucky Lucke),…
• Chèc en blanc : Dins lo temps, los potons èran pels amoroses o pels rescontres de familha. Arribèt un temps ont, entre òmes, nos sarravèm pas mai las mans… Mas aquò es a cambiar amb lo mot d’òrdre : « Pas de potons, pas de man que se juntan… Vos cal faire un chèc ! ». Mas sabi pas se devi faire seguir en permanéncia mon quasernet de chècs per ne balhar un a totas las personas de coneissença que rescontri (bon, sentissi que vau pas conéisser grand monde e que me vau amagar darrèr - per exemple - una… masqueta) o alara se los jorns pars es lo monde que me balha un chèc (sortirai que los jorns pars) e los impars es a ieu de ne balhar. Es que se pòt remplaçar aquel chèc per la carta bancària ? Qual(a) me sauprà respondre ?
- La circulara : La Constitucion es la garantida del bon foncionament de las institucions. Alara, quand lo Conselh constitucional ditz non a l’ensenhament immersiu en lengas regionalas, per qun miracle una circulara del ministèri de l’Educacion (lo Blanquer deviá faire lo sieston) capita d’explicar que tot va plan, que l’ensenhament immersiu es possible e que Calandreta, Diwan, Seaska, Bressola, Scola Corsa pòdon contunhar lor òbra que se poiriá espandir dins l’ensenhament public ? Dins la bona tradicion francesa , avèm ara un tèxte de referéncia que nos sèm ganhats a fòrça de mobilizacion, d’explicas, … I ajustan per subrepés un Conselh interministerial de las lengas regionalas : demòra d’esperar que serà pas un d’aquòs que se contentarà d’existir mas que poirà butar a l’espandiment e a l’organizacion de l’ensenhament de las lengas regionalas de la mairala a l’universitat. Aquò vòl dire : fixar d’objectius, formar d’ensenhaires, dobrir corses, classas e establiments, aver una vertadièra politica linguistica apiejada sus l’expression de la biodiversitat culturala e linguistica,… La circulara se pòt pas contentar de nos faire virar en redond : fàcia a totes los frens rapòrt a nòstras demandas legitimas, vos disi que sèm pas al cap del camin e que caldrà plan que França n’acabe amb son ipercentralisme e sa volontat monolinguistica.
Destimborlat Roch
Cap comentari:
Publica un comentari a l'entrada