Una organizacion novèla per l’IEO

Comunicat IEO- 11/01/2022

Au mes de setembre passat, lo conselh d’administracion de l’Institut d’Estudis Occitans aviá alertat sus las grandas dificultats financieras e d’organizacion a las qualas l’associacion era confrontada, e aviá apelat l’ensemble daus aderents a se mobilizar e participar a l’amassada generala dau 17 d’octòbre a Tolosa. Maugrat los problemas deguts a l’organizacion tardiera de l’AG e las constrenchas sanitàrias, la mobilizacion fuguet fòrça importanta. Si lo nombre de personas fisicament presentas a l’amassada generala fuguet limitat, los messatges de sosten e los poders mandats fugueren plan nombrós. Son 175 personas, presentas e representadas, que participeren a l’amassada. Aprep la presentacion dau rapòrt d’activitat e dau rapòrt financier per l’annada passada, adoptats a l’unanimitat, la discussion se concentrèt sus las relacions entre l’IEO e l’Ofici public de la lenga occitana, e la faiçon d’assegurar la continuitat d’activitat de l’IEO en abséncia de salariat.    La discussion contunhet dins l’aprep-miegjorn sus l’organizacion e lo foncionament de l’IEO a metre en plaça per assegurar autant coma possible lo manteniment de sas activitats.    ------ Per entau far, l’amassada generala adoptet los principis seguents :  favorizar la mutualizacion entre l’IEO nacionau e las seccions regionalas o departamentalas que dispausan de ressorsas o de competéncias necessàrias a l’IEO nacionau, notadament jos la fòrma de prestacion de servicis ; tornar assegurar la parucion de la revisda Anems ! Occitans ! ; organizar lo fonctionament dau Conselh d’administracion a distància ; metre en plaça una Conferéncia consultativa daus presidents de seccions departamentalas per facilitar la participacion de las associacions afiliadas au foncionament de l’IEO.   En mai de quela reorganizacion de l’IEO, l’AG tornet afirmar la necessitat d’interpelar las collectivitats regionalas sus l’abséncia d’ajuda financiera a l’IEO, associacion panoccitana e federativa d’un malhum d’associacions sus l’ensemble de l’espaci occitan.  Enfin, l’amassada generala elegit a l’unanimitat manca 3 absencions un noveu conselh d’administracion de 12 membres, aus quaus s’aponden los representants de chasca seccion regionala. En seguida de l’AG, un prumier CA s’amasset lo 17 d’octòbre per metre en plaça un foncionament provisòri, perfin d’assegurar la continuitat de las accions de l’IEO avant la tenguda a distància d’un conselh d’administracion electiu. Queu CA se tenguet lo 16 de novembre, e decidet la pesa en plaça d’una organizacion collectiva.    Entau, lo CA elegit un bureu constituit de 12 membres demest los quaus una tresoriera, un tresorier-adjunt, 2 vice-president e presidenta encharchats dau secretariat e dau secretairat adjunt, e 5 co-presidents e presidenta, encharjats de  la revisda Anem ! Occitans, de l’edicion, de la difusion, de las relacions externas, e de la conferéncia daus presidents de seccions departamentalas. De mai, doas comissions son estadas constituidas per l’organizacion dau secretariat e de la publicacion de la revisda. Emb la mobilizacion importanta de sos aderents, la tenguda d’un AG fruchosa emb l’eleccion du CA renovelat, e la mesa en plaça d’una gestion collectiva de son foncionament, l’IEO a montrat sa volontat de contunhar çò que fai son pretzfach dempuei sa creacion e sa capacitat a se reorganizar per enfaciar las dificultats e las entraupas.  Pasmens, la situacion demòra malaisida e l’esfòrç collectiu deu èsser mantegut. L’implicacion benevòla es fondamentala, mas pòt pas se far sens mejans. A l'abséncia d’ajuda de las collectivitats territorialas, las solas ressorsas financieras actualas de l’associacion son las cotisacions e los dons de sos aderents.    Au començament de l'an novèu, lo CA apèla alaidonc tots los aderents a manténer lor sosten a l’IEO e a tornar prene los adesions, que l’annada 2022 siá una annada de reviscolada e de novelum per l’IEO au servici de la lenga e de la cultura occitanas.    ----- De mai, un numèro de la revista es a se preparar, donarà mai de detalhs sus l'equipa en plaça e leis accions en cors… ­

­

­

­

­