Lo Mescladís, de Bobí lo Contejaire. (Robèrt Pastor) Cada dijòus dins Midi Libre, Pays coeur d'Hérault, edicion de Lodèva.
Dissabte 19 de març ! Es jorn de Carnaval a Montadavala !
Mas amb la guèrra en Ucraïna, cossí far per plan preparar lo Carnaval ? D'acampaments en acampaments, la còla del Fogal Rural e lo cònsol de la comuna diguèron : « Cal far Carnaval per tot lo mond, per los Ucranians! E l'argent de las aurelhetas serà virat a la Crotz Roge per ajudar los Ucranians ! ».
L'exposicion de Guilhem e Jaume èra dins la sala del Fogal Rural : dètz cartèls amb tèxtes, fotòs, dessenhs : « Istòria del Carnaval, Carnavals del mond, de França, d' Occitània, los bestials totemics d'Erau, e cartèls amb recèptas, poesias e cants ». De trabalh de primièra !
Sus la plaça del vilatge, lo mond se sarrava : de blau e de jaune dins los desguisaments, coma per ajudar los Ucranians...
« LosManjacebas » joguèron de musicas e danças plan conegudas : Joan Petit que dança, mon paire pecaire, Calant de vilafranca, ....de farandòlas, de borrèias, de gigas e tot lo mond dançava dins las carrièras del vilatge ! Lo « Caramentrant COVID » èra plan afrós amb un nas tòrt de pichòts uèlhs negres e crudèls e de « viruses » empegats sus tot lo còs !
Davant la sala del Fogal Rural, lo tribunal s'acampèt e lèu « Caramentrant COVID » foguèt condemnat a èstre brutlat ! E « Los Manjacebas » de jogar : « Adieu paure Carnaval », cantat per totis seguit per una granda farandòla, sus l'aire dels « acabaires », que durèt mai de dètz minutas !
Se crompèt totas las aurelhetas, l'exposicion foguèt plan aimada, comentada... de cançons e de musicas encara e encara fins sèt oras del ser ! Carnaval èra fòrça festejat !
Guilhem e tota la còla del Carnaval cridèron : « A l'an que ven, CARNAVAL ! e dins un mond sens guèrra ! » E los Montadavalencs respondèron : « Òc , sens guèrra, sens guèrra ! ».
A la setmana que ven !
Cap comentari:
Publica un comentari a l'entrada