I a lo fuòc !

 

Diga ! Vòle aquí saludar los amics de Gardonenca e mai que mai son Conselh departamentau que diguèt de non, setmana passada, a aquela mascarada de la flama olimpica. Francament, aquò es mai fòrt que lo Ròcafòrt, per de jòcs sonats París 2024, -quitament pas França 2024- per de jòcs que nos costaràn peu e borra e que faràn pagar au país tot, los parlaponchuts te vòlon ara faire racar als departaments traversats per sa lugarèla de 150 a 180 000€ la jornada. E ben a Nimes coma au Clapàs e coma dins un desenat de departaments diguèron de non e aguèron rason. Me triga de veire totes los d’Occitania e d’endacòm mai far çò mèmes.

Pro, an que de la far sus son periferic, sa procession als candelons, de qué nos venon ficar en caire aquí. En mai, imagina-te, au mes de julhet, un flambèu a travèrs un Camp de las garrigas qu’un pas res de beluga bastarà a abrandar. Cau que siagan nècis los d’amontdaut pas que d’i aver soscat !

E puòi, los nòstres elegits poirián, sus la lançada, dire de non a un torn de França que privatiza las rotas que son nòstras, que respiècha pas solament lo nom dels vilatges traversats : « Cette année le tour passe à Véloques » - A bon passa pas pus a Vailhauqués… Un torn que sos 2300 veïculs te craman amb sos elicoptèrs milièrs de litres de gasòli e que t’escampa dins la natura 18 milions de salopariás publicitàrias e mai de 9 tonas de saussissòts industrials plastificats… Òu, se me vòlon portar lo saussissòt an que de lo portar en bicicleta, de La Cauna la rota davala.

Vòls que te diga ? Per tornar als jòcs, aqueste còp poiràn pas copar Viure al país que dins l’estiu passa pas pus. E francament, es la sola bona causa qu’i veja. Sèm pas flames.

Enfin, per çò que ne dise, ieu.

 

La guinhada de l’IEO34. E, rau !