Es un ase !

 

Lo Mescladís, de Bobí lo Contejaire. (Robèrt Pastor) Cada dijòus dins Midi Libre, Pays coeur d'Hérault, edicion de Lodèva.

« Es un ase ! » es a dire nèci, pas trop intelligent.

Avètz mai d'un còp ausit, benlèu dich aquela frasa !

Mas l'ase es pas tan nèci qu'aquò !

De sègles e de sègles l’ase foguèt una ajuda de primièra per l'òme : tirar de carretas pesugas, trabalhar la tèrra, se passejar...

E l'ase se trapa mai d'un còp dins los pròverbis e dichas : 

"far lo repas de l’ase, es a dire sens beure"; 

"pesar un ase mòrt !" Es plan conegut, qu’es pesuc aquò ;   

d’un que se banda mai d’un còp : "Beuriá  al cuol d’un ase ; 

"bridar l’ase per la coa !" Es a dire de revèrs ; 

"aquò va ben coma una rauba a  un ase." que siás mal vestit ; 

"aquel a l’aire d’un ase que vòla ", es  pas tròp avisat ; 

"èstre fatigat coma un ase per vendémias", e òc, un brave trabalh que fa l’ase ; 

"rire coma un ase dins un brèç", plan s’amusar, rire, ;

"Fa un solelh a asclar lo cap als ases", es un solelh plan, plan caud ; 

"bracejar coma un òme qu’a perdut son ase" ; 

"fòrt coma un ase doble" ; 

"per un punt Martin perdèt son ase" , per gaire se pòt tot perdre ; 

"es coma demandar a un ase se vòl bren" : aquò’s plan evident; 

"a pas mal estacat son ase, es desvengut ric"; 

"s’as pas de buòu fa laurar l’ase"; 

"un temps per l’ase, un temps per aquel que lo mena"; 

"òm coneis pas un ase res qu’en lo vesent córrer" : se cal mesfisar de las aparéncias; 

"un ase magre, totas las mòscas lo pican", es mas aisit de far patir los paures, los que podon pas se defendre ; 

"bolegar coma un ase mòrt"; 

"Los ases fan los testaments e los notaris los pòdon pas desfar ».

Vaqui per l’ase ! Benlèu avètz d’autres dichas, provèrbis sus l’ase , cresi que ne manca pas ! Veirem lèu d’autres provèrbis e dichas sus las bèstias mas tanben sus l’òme dins sa vida, son biais de far, sus las cresenças d’un còp èra, sus las sasons, las fèstas tradicionalas dins Occitania.

Adieu, portatz vos plan e al còp que ven !