La vida

  Lo Mescladís, de Bobí lo Contejaire. (Robèrt Pastor) Cada dijòus dins Midi Libre, Pays coeur d'Hérault, edicion de Lodèva.  

La vida es lo darrièr album d'Eric FRAJ. Tres C.D. amb 50 cançons (44 inedits!) per 50 ans de cantaire !

Un trabalh plan fach, seriós amb una còla de musicians , cantaires : Guillaume López, Morgan Astruc, Mingo Josserand, Sarah Fraj e d'autres que traparetz dins l'album.

Una votz totjorn mai agradiva d'escotar, de tèxtes poetics, tèxtes d'espèrs e  renonciaments, tèxtes d'amor d'Eric, e d'autres tèxtes de Bodon, Perbòsc,Villon, Lluis Llach, Robèrt Marti...

Eric canta sobretot en Occitan, en Catalan, Castillan, Italian e Francés que son sas « lengas del còr ».

Eric FRAJ èra vengut en 1982 a Lodeva (Cercle Occitan) cantar e presentar son album  vinil ,« Cantaré », e una cançon « Marinièr » que podètz trapar dins l'album « La vida ». (CD.2)

Cal crompar aquel album editat per Troba Vox !

Vaquí un tèxt, plan polit, del CD1 : « La lenga d'òcre » cantada amb Guillaume López - Paraulas e musica : Eric FRAJ.

Quand camini pel campèstre

per aprene la lenga d'òcre

Me fau vesent per un encontre

ambe bruns, jaunes e roges

Tot està dins l'aparèstre

la vida es una gamma

e sa vertat se fa entendre

a qui la vòl, escota e gaita

 

Parla-la la lenga d'òcre

parla-la dins  sos dialèctes !

 

Aquel gost d'argela canta

dins cada son de sas tintas

e l'uèlh ambe la lutz s'inflama

dins de nòças sense bòrnas

Escotem las causas mudas

que surgentan glop per glop

s'escampilhan en mila fòrmas

en mila voses e colors

 

 Parla-la la lenga d'òcre

parla-la dins  sos dialèctes !

 

Cresi pas qu'a l'incessant

vai-e-veni del multiple

qu'es del mond la carn, la sang,

lo mistèri insasible... 

 

Parla-la la lenga d'òcre

parla-la dins  sos dialèctes !

 

Al còp que ven , e portatz vos plan !

 

Contact : ericfraj@hotmail.fr  / www.trobavoxeditions.com

Se pòt escotar « Lo Mescladís » de Bobí sus lo sitede Ràdio Lengadòc o de Ràdio Lodeva.