Las aurelhetas

 Lo Mescladís, de Bobí lo Contejaire. (Robèrt Pastor) Cada dijòus dins Midi Libre, Pays coeur d'Hérault, edicion de Lodèva.  

« Divendres de ser, farem las aurelhetas, la setmana que ven es Dimars-gras ! ».

Aital veniá de parlar mamà. Aquò se passava dins las annadas1970 dins lo nòstre apartament H.L.M. de Besièrs.

Aimava cosinar, la mamà.

Aviá tot crompat : farina, limon, aiga de flor d’irange, uòus, sucre glaça, burre, òli…

E a cadun lo trabalh : mamà mesclava los ingredients, ieu  pastejava, papà « padenejava »!

Mamà mesclava los ingredients dins una ensaladièr per far la bola de pasta, puèi disiá : « Cal pastar un brave moment, aquò’s lo secret, la capitada ! »

Aquel trabalh m’agradava fòrça, un pauc encigalat de las odors de flor d’irange e de limon ! Puèi mamà metiá la bola dins un toalhon al fond del refregidor. « Cal daissar repausar tota la nuèit ».

L'endeman, la pasta éra copada en pichòts cubs, espandits amb una botelha de veire, bestortièr de fortuna !  « E plan finas, per èstre plan bonas ! » disiá mamà.

Papà aviá aprestat una padena amb d’òli bolhent.

Li passavi una aurelheta. La metiá delicadament dins la padena sens se brutlar, tot un biais de far ! La virava amb una agulha de debàs per coire l’autre costat, puèi l’estorrava al dessús de la padena abans de la pausar dins un plat. Mamà  la salpicava  de sucre glaça. De còps, una aurelheta se copava. Quina bona fortuna ! Èra lo moment de tastar e de dire lo nòstre vejaire !

E de ser amb los cosins, convidats cada annada, las aurelhetas éran plan tastadas e cada còp la cosina  disiá : « Denisa (la mamà), la reina de las aurelhetas ! » Esmoguda, mamà respondiá :  «  Mercé, mas es pas tròp complicat, cal de temps e sobretot botar los bons ingredients ».

Al còp que ven !

* Ingredients : 1 quilò de farina- 8 uòus – 250 g de burre fondut – 2 culhièrs d’aiga de flor d’irange- 1 culhieron de sal- chuc e pèl de limon .