« La cultura en occitan » es lo jos títol d’aquesta revista publicada cada dos meses per la Federacion de l’IEO de la Region occitania. Amb son quarantenat de paginas ten plan son amira de parlar en occitan de cultura, e o fa d’un biais originau e plasent amb una escritura variada e viva qu’es plan bona. Lo Diari capita ben de mostrar que la cultura occitana es en borbolh dins la vida dau sègle 21en. Cada numèro ten un dorsièr centrau qu’es l’escasença de descobèrtas amai pel mond que ja coneisson plan nòstra cultura. Dorsièr Cinèma per l’avant darrièr numèro e per aquel de mai/junh se tracha de « Pop Culture e musicas popularas » amb un fum d’entrevistas e d’articles. Aitau l’Alexandre Barthès de la federacion Octopus das musicas actualas fa un tablèu espantant : « Trobam de tot, de musicas per escotar, per cantar, per dansar, per pogotar ! E segur lor punt comun es la lenga ». E tanben un encontre amb Paulin Courtial dau duò CXK qu’aprèsta un disc novèl aprèp l’excellent EP Diga-me. Mai ! D’articles regulars d’actualitat literària e artistica d’òc per de signaturas que son garentida d’originalitat qualitadosa. Estent la situacion de nòstra cultura dins son país, per aver mai d’informacion, cau anar sus la planeta internet au sit : lodiari.com. E i vos poiretz abonar.
De picar sus lo pegasolet:
La traduction à retrouver sur Midilibre.fr
Cap comentari:
Publica un comentari a l'entrada