Qual sap ? Benlèu qu’en decembre 2020, poiriam
escriure :
En abril, sabiam pas pus ont botar los malautes del Coronà
virús. Totes los espitals de França èran
« overbooker » Èra pas de creire ! D’aquel temps, confinats en
abril – papà mamà en decembre A l’ora d’ara totes los espitals son
devenguts de maternitats e son « overbooker »! Pas una plaça de
liura ! Pas una plaça de liura ! Mètges, infirmièras ,
ajuda-sonhantas sabon pas ont balhar de la tèsta !
Maternitats-espitals son talamai confles, que a calgut
requisicionar e maternitalizar 20 TGV OUI-GO, per desplaçar mamàs e nenons de
Colmart à Bordèu. Los papàs arribaràn quora podràn ! Es un avion militari que
a desplaçat un trentenat de mamàs prèstas a s’ajaçar en Alemanha ! Un
elicoptèr « Puma » a cargat tres mamàs de Metz per las menar a Quimper. Mas an pas agut
lo temps de i arribar ! Doas nenòtas e un nenon an espelit dins
l’elicoptèr. An descolat a uèch e an aterrit a onze !
Son pas de masquetas que mancan los sonhants, son de
braionetonas – des couches - pels
nenons e nenotas. Pareis que n’avián 1 milion en resèrva mas foguèron flambadas
en una setmana ! L’usina Pampers trabalha jorn e nuèch mas ne manca
totjorn. Urosament que la China es aquí per velhar, non ! per
aprovisionar ! Coquinassa ! Ièr, per manca de papièr igienic, erèm
dins la mèrda. Uèi, per manca de braionetonas, i sèm totjorn !
Manca granda de tetarèls ! de biberons ! Pasmens aver de tetarèls en resèrva dins las
maternitats es lo Beabà ! Cal requisicionar totas las botelhas de bièrra, far
beure la bièrra als papàs e a las mamàs,
remplir aqueles botelhons de lach e qu’un còp remplits los tapar amb
un pelhon per far lo gota a gota ! Del temps que los nenons chucan
lo pelhon, Corona, Heineken, Karlsberg se fretan las babinas !
E
parlem pas dels brèçes, des berceaux ! Manca granda de brèçes dins
totas las maternitats ! Los papàs e las mamàs son arreduts de téner los
pichonets dins lors braçes jorn e nuèch ! Totes los brèçes que dormissián
al fons dels galatrasses tornon prene de servici ! En plastic, en ferre, en bosc, tot fai brèç. Las
vièlhas panièiras son tanben de sortida! L’armada francesa va fornir des
« lit Picot ». Del còp, la
generacion « Picot » arriba!
Lo responsable d’aquelas naissenças espectaclosas de
nenons e de nenotas, lo
coneissètz ! Lo coneissètz ?
Sens el, la vida auriá pas ganhat sus la mòrt ! Amai se nos a
engarçat bravament, d’aquò lo mercejarem jamai pro !
La
vida es mai fòrta que la mòrt !
Andrieu Clamenç
 |
| Picat sus l'imatge, i tombaretz |
