Diga ! Ai d’aquela marrana que nos arrestam pas de ne pagelar las consequéncias… Pasmens dins la tempèsta e las èrsas que se seguisson, de còps que i a, vesèm subrondar de nòvas de las bonas ! De fach, me daissère dire que, dempuòi lo mes de març, França seriá venguda intelligenta… O avètz pas remarcat ?
Primièr, amb l’escòla a l’ostau, lo nivèl escolar dels parents montèt d’un biais incredible e puòi i aguèt, consacracion fantastica, lo bac opcion covid amb de resultas espectaclosas ! De memòria perduda, s’èra pas jamai vist : dins las Corbièiras, los descendents de Neanderthal, qu’i disèm amistosament las tèstas platas, auràn totes lo bac per anar podar aqueste ivèrn. Saique lo vin serà melhor ? A Bosigas e tanben a Montfavet, au país de las favas, totes l’aguèron lo bac, amb mencion especiala « aganta colhon » ! E a Niana… Dempuòi qu’òm l’esperava ven enfin de cridar seba la malediccion vièlha de l’I. A. –l’Innocéncia Anianenca. Passam doncas a l’I. E. -Innocéncia Escampilhada- qu’aver de bagatges es lo mejan melhor per desbagatjar…
Vòls que te diga ? E ara ? Levat per la paga, m’agradariá pas d’èsser president d’Universitat d’aquela ora. Copacap : faire dintrar tot aquel mond en los espacejant cada mètre cairat sens butar las parets en esperant las evaporacions successivas que fan qu’au polit mes de mai i pas digús en cors. Es la lucha de las classas que se’n torna, seràn mai esquichats que los cuols nuses dau Cap quand, sus lo balcon de son ostalariá, jogavan aqueste estiu, sens masquetas als quatre cambajons ! Enfin per çò de la lenga nòstra, bac o pas, que siaguèssetz de Niana o de Bosigas, podètz butar los estudis. L’IEO se’n torna, qu’aquò se diga, qu’aquò se sàpia !
E, rau !
La guinhada de l’IEO34. E, rau !
Cap comentari:
Publica un comentari a l'entrada