La cronica occitana dau Joan Loís Blenet
Ven de sortir un libre en occitan que nos presenta la crisi catalana vista per un dels actors màgers.
De libres en lenga nòstra que parlan de l’actualitat n’i a pas tant. Per aquò cal saludar e faire conéisser la sortida de la revirada del libre de Carles Puigdemont, 130en president de la Generalitat, ara en exili a Bruxelles e deputat europenc maugrat la curiosa justícia dau reiaume d’Espanha. Lo títol n’es previsible « La crisi catalana » e en jos títol « Una oportunitat per Euròpa». Son las edicions Vent terral que publican, e la revirada es de Sèrgi Viaule e Jòrdi Blanc, dos afogats de literatura, de libres e d’occitan. Son de convèrsas amb un jornalista que fan una presentacion larga de l’istòria tota cauda de Catalonha. De segur amb lo vejaire de Puigdemont, mas es pas marrit de conéisser en detalh los eveniments d’un bòrd qu’es gaire presentat pels grands mèdias d’aicí.
La crisi catalana se’n parla mens mas contunha de confir. Fa un parelh de setmanas, la « justícia » dau reiaume inabilitèt lo president Torra, successor de Puigdemont. I aurà tornarmai d’eleccions e los sondatges indican que lo vòte indé va pujar. Fa pas de mau de s’assabentar de çò que se passa en cò dels vesins, de descubrir una realitat politica que coneissèm gaire. Amai lo ligam del país d’òc amb Catalonha es prigond : cantam ben, dempuèi Mistral, « la Copa Santa que nos ven dei catalans ».
Traduction à retrouver sur Midilibre.fr
Cap comentari:
Publica un comentari a l'entrada