diumenge, 25 d’octubre del 2020

Cobrifuòc e morralhon

 La guinhada de l'IEO d'Erau sus RÀDIO LENGADÒC

(Picatz sus l'imatge, i tombaretz)

 

Diga. Me passejave l’autre dimenge per los camins rascanhuts dau rèire país que i vive. Sabètz, es un ròdol que se i pagan las talhas coma s’èretz en plen París mas ont las rotas desondradas tenon mai de traucs que de quitran e ont lo gramenàs e los valats fan benda d’arrèst d’urgéncia. Rai. Ère a badar lo país a dètz a l’ora, quand me sortiguèron d’una blaca dos chins qu’avián levat saique quauque lèbre o singlar, vai te’n saupre? E de me montar la carrèla. Aqueles chins èran normals fin finala, coma tus e ieu, de bèstias chins, tot çò que i aviá de mai chin. Vòle dire, èran pas de chins de la vila que son per d’unes de  traçonets de ratasses pomponejats per un mèstre perruquièr o de Macanichas apasturats au Ragost-minon e per los autres, de morres espotits, geneticament modificats per tugar amb de maissas d’acièr mas que petan de longa sus lo radassièr de sos proprietaris que los patricolatges d’adn an de còps sos limits.

 

Vòls que te diga ? Sèm cuòches, la guèrra es mondiala e l’avèm perduda, l’enemic es coma lo Credit Agricòla, es pertot ! Marcamau se passeja tornarmai, au mercat negre se trapa encara a prètz fòrt mas per pas gaire, pastas e papièr cuol… Lo cobrifuòc es declarat -es enebit de sortir de son ostau de nuòch quand i a pas digús per carrièira, cau sortir lo jorn quand tot lo mond son defòra- e veja-lo aquí mai : lo papafard de sortida amb derogacions… E aquí, òsca Manòsca ! Vòstre pitbul a lo drech de vos menar pissar dins la gandòla per pauc qu’agèssetz totes dos lo morralhon reglamentari.

Enfin, es çò que ne dise ieu.

 

La guinhada de l’IEO34. E, rau !

Cap comentari:

Publica un comentari a l'entrada

Los mai legits