La politica nos ofrís de miracles coma de far de trionfes electoraus sens electors. Enclausits
dins nòstras eleccions pre-presidencialas avèm pas vist que la politica nos ofrissiá un miracle de l’amor. Aquò se passèt en Catalonha ont sabèm dempuèi Mistral qu’i avèm de fraires. Lo Conselh d’Euròpa que recampa los 47 Estats del continent a finit per estudiar l’afar dels catalans. Ne tirèt la conclusion que çò que se passa au Reiaume d’Espanha, coma en Turquia, es pas brica compatible amb la democracia. Votèt lo 21 de junh, per 70 voses contra 28, l’exigéncia de liberar los presonièrs politics, de reformar los delictes de sedicion e malversacion e d’arrestar de perseguir Puigedemont e los exiliats.
E vaquí lo miracle. Prevengut, lo cap dau govèrn, Pedro Sanchez, organizèt a tota borra pel meteis 21 una conferéncia bèla a Barcelona. I diguèt amb estrambord qu’an retrobat l’Amor. Lo paure el s’èra perdut dins lo palais reial del temps qu’aplaudissian los matracatges, embarraments e condemnacions « la mano en la mano » amb la drecha e son extrèma, Vox. Dins un discors plen de paraulas nòblas, convivéncia e respècte, anoncièt que lo 22 farián la gràcia als engabiats. E aquò sens cap d’influéncia mas per la simple e bèla rason que « Vos aiman, catalans ! ». Meravilhas de l’amor !
Traduction à retrouver sur Midilibre.fr
Cap comentari:
Publica un comentari a l'entrada